Shillong, Nailur 14
Ka kynhun ïalehkai ka Jylla, ka OM Roy Memorial HSS kan pynkhreh ïa ka jingïalehkai kaba nyngkong ha ka 65th Subroto Cup International Football Tournament 2026, pyrshah ïa ka Uttar Pradesh ha ka sngi Ba-ar ha nongbah Delhi.
Kane ka jingïakhun kan long ha ka por 8:30 mynstep ha madan ïalehkai jong ka Subroto Park kaba ha nongbah Delhi.
Ha kane ka kyrdan ïalehkai Under-17 boys, ka OM Roy ka la shah pynngat ha ka Pool-A kaba kynthup lang ïa ka CBSE, Delhi, Uttar Pradesh bad ka Andaman & Nicobar. Ki don 40 tylli ki kynhun ki ban shim bynta ha kane ka lympung, ha kaba la phiah ha ki phra tylli ki group.
Kumba ka paw kane ka kynhun ïalehkai kaba na Mawlai Kyntonmassar, ka la long sa tang kawei ka kynhun ka ban mihkhmat ïa ka Jylla hadien ba ka Little Star English Medium HSS (Under-17 girls) bad ka North Liberty HSS (Under-15 boys) ki la shah rem noh ha kane ka lympung.
Watla ka OM Roy ka la rah teng ïa ka nam lahduh ha u snem 2013, hynrei ka la khmih lynti ba kan ïalehkai bha ha kane ka lympung khnang ba kan lah ban pynurlong ïa ka nam jop.
Katkum ka prokram, la ong ba ïa ka jingïalehkai quarter final yn pynlong ha ka 21 tarik, katba ka semi final kan long ha ka 22 tarik bad ka final kan long ha ka 24 tarik.
