Shillong, Nailur 14
Ka lympung ïalehkai Meghalaya State Senior Athletics Championship 2026 ka la sdang ha ka lah sngi U Blei ha SAI Training Centre, ha kaba la wan shim bynta da 267 ngut ki nongïalehkai na kylleng ki district ka Jylla.
Ha kane ka sngi sdang, ka Ri-Bhoi ka la ïoh ban lamkhmat da kaba ka la khur 6 tylli ki takma ksiar, bad mar kawei ka takma rupa bad rnong. Ka Eastern West Khasi Hills ka la wan ba-ar da kaba khur 2 ki takma ksiar, 1 ka rupa bad 2 ki rnong, ka West Jaiñtia Hills ka la wan balai da kaba khur 1 ka takma ksiar bad 3 ki rupa.
Ha kane ka lympung talehkai kaba lai sngi la pynlong da ka Meghalaya Athletics Association ha ryngkat ka jingkyrshan lang da ka tnat ïalehkai ka Sorkar Jylla.
Ïa kane ka lympung la wan ban plie da u Director ka tnad ïalehkai jong ka Sorkar Jylla u Bah Alertson Nongbri kum u kongsan ha kaba la ïadon lang u Deputy Director Bah PB War Nongbri, ki dkhot ka MAA kiba kynthup naduh u Senior Vice-President Bah EMH Passah bad kiwei kiwei.
Haba ai jingkren ha katei ka sngi, u Bah Nongbri u la mynjur ba kane ka dei ka por kaba biang bha ban pynkhie im biang ïa kane ka lympung ïalehkai. “Kiba tbit bha na phi kin ïoh ban mihkhmat ïa ka Jylla jong ngi sha ka National Games.”
U Bah Nongbri u la kdew ruh ïa ka jingwanrah jong ka sorkar jylla ïa ka prokram ai jinghikai kaba la buh ryntih, ka skhim ai khusnam pisa bad ka jingai jingkyrshan ïa ki nongïalehkai kiba jop da ka kam. “Ka sorkar ka angnud ban don uwei u nongïalehkai Olympic na Meghalaya ha u snem 2032 bad mano ban long uta u khlur ba kynsai? Dei ma phi,” u la ong ïa ki nongïalehkai da kaba bynrap ba ki dei ban angnud ïa kiba kham heh namar ym don kaei kaei kaba ym lah ban long.
Ha kane ka lympung kaba lai sngi ki don 166 ngut ki shynrang bad 101 ngut ki kynthei ki ban shm bynta ha ki 37 tylli ki jingïalehkai. Ki don ruh 120 ki ‘technical official’, kynthuh ruh kiba na ka Athletics Federation of India (AFI).
Wat hapdeng ka jingpynthud u slap, hynrei ki nongïalehkai ki la ïoh ban shim bynta ha ki jingïakop mareh jong ka 100m bad ka 1500m jong ki shynrang bad kynthei.
Ka Monlangki Kyndait (WJH) ka la khur ïa ka jingjop ha ka 1500m da kaba pyndep ha ki 5 minit bad 25.86 sekhon, katba u Marshal Wanniang (EW-KH) u la khur ïa ka takma ksiar da kaba pyndep ha ki 4 minit bad 8.29 sekhon. Ïa ka takma ksiar ha ka liang ki kynthei jong ka 100m la jop da ka ‘thei ïalehkai na Ri-Bhoi ka Phibakmen Rynghang (13.07 sekhon), katba u Banraplang Lapang (Ri-Bhoi) u la khur ïa ka takma ksiar da kaba pyndep ha ki 11.02 sekhon.
