Shillong, Nailur 15
Ka Jylla ka la khur ar tylli ki takma ha ka rynsan ïakop pyni dohksah ba la tip kum ka 2nd North East Body Building Championships 2026 kaba la long ha ka 11 bad 12 tarik mynta u bnai ha Kohima, Nagaland.
Kine ki long u Vikas Chettri (above 80 kg) bad u Taichang K Marak (70 kg), kiba la khur ïa ki takma rnong, katba ka Dr. Mebanrilin Synnah (Women’s Model Physique) ka la wan ha ka kyrdan basaw.
Ïa kane ka jingïakop la pynlong da ka Nagaland Bodybuilding and Fitness Association (NBBFA) hapoh ka jingkhmih da ka Indian Bodybuilding and Fitness Federation (IBBFF) bad ka Northeast Bodybuilding Federation (NEBBF).
Nalor kitei ki 3 ngut, ka Jylla hapoh ka lama jong ka Meghalaya Body Builders’ Association ka la phah ruh ïa ka Shano Chelsy M Sangma (Women’s Model Physique) ka bym shym la lah ban kynjoh sha ka thong.
Ha kane ka lympung la kynthup haduh 9 tylli ki kyrdan jingïakop. Ha ka Men’s Bodybuilding ki long ka 55 kg, 60 kg, 65 kg, 70 kg, 75 kg, 80 kg bad shaneng. Ha ka Men’s Sports Physique ka kynthup naduh 165 cm bad shaneng. Katba ha ka Women’s Model Physique ka long na ka bynta ïa baroh.
