Shillong, Nailur 15
Ka Ri-Bhoi ka lamkhmat ban khur medal ha ka sngi ba ar jong kane ka lympung Meghalaya State Senior Athletics Championship 2026 halor ka jinglah ban lehkai bha ha ka 15 Nailur 2026.
Ka Ri-Bhoi ka don 8 ki ksiar, 3 ki rupa bad 6 ki rnong, katba ka East Khasi Hills ka la kiew sha ka kyrdan kaba ar ryngkat 4 ki ksiar, 4 ki rupa bad 1 ka rnong. Kane ka la pynhiar noh ïa ka Eastern West Khasi Hills sha ka kyrdan kaba lai kaba don 3 ki ksiar, 2 ki rupa bad 3 ki rnong.
Ïa kane ka lympung lehkai ba lai sngi la pynïaid da ka Meghalaya Athletics Association (MAA) hapoh ka jingkyrshan jong ka Directorate of Sports and Youth Affairs ha ka Sports Authority of India (SAI) centre kaba don ha campus jong ka NEHU Shillong.
Ka East Khasi Hills ka la jop ha ka 4x400m relay jong ki shynrang bad ki kynthei bad kumjuh ruh ha ka 5000m jong ki shynrang ba la jop da u Daniel L Wahlang. Ka gold medal ha ka 5000m jong ki kynthei la rah da ka Balasiewdor Pathaw.
Ka Ri-Bhoi ka la jop ar tylli ki gold medal mynta ka sngi lyngba ka Anrisha Klein ha ka ‘long jump’ jong ki kynthei bad u Banistar Syiem ha ka ‘shot put’ jong ki shynrang.
Baroh ar tylli ki 4x100m relay la jop da ki kynhun na West Jaintia Hills, katba ka East Khasi Hills baroh ar tylli ha ka kyrdan ba ar.
Ki nongïalehkai na Garo Hills ruh ki don bun kiei-kiei ban lehkmen, u Tushal M Sangma u la rah ïa ka gold medal na bynta ka North Garo Hills ha ka ‘javelin’ jong ki shynrang. Ka Dilme Ch Marak na South Garo Hills ka la jop ha ka ‘Discus event’ jong ki kynthei bad ka Nokme Ch Sangma (SGH ruh) ka la jop ha ka’ javelin’ jong ki kynthei. U Eliam Bonkam G Sangma u la ai ha ka South West Garo Hills ïa ka medal kaba nyngkong duh lyngba ka ‘gold’ ha ka ‘long jump’ jong ki shynrang.
Katba ka Tengsilchi B Marak ka la jop ha ka jingïamareh ‘ race’ 400m jong ki kynthei katba u Lastly Surong u la wan kaba nyngkong ha kane ka juh ka race jong ki shynrang na bynta ka East Jaintia Hills.
Baroh ki Distrik ki la lah ban jop watla ka long tang kawei ka medal na kine ki ar sngi ba nyngkong. Bad ki bun tylli ki jingïalehkai kiba dang sah, ka don ka lad kaba kyrpang ïa ki nongïalehkai ba kin nang lah ban lehkai bha na bynta ki Distrik jong ki bad khamtam ban buh kyrteng ïalade na bynta ka 39th National Games kaba sa tang katto katne bnai mynta.
