Guwahati, Nailur:
Ki bor ba dei khmih bad ki pulit ki jylla ka thaiñ Shatei-lam-Mihngi kila ïakhun pyrshah ïa u drok da ka buit treikam ba ïatreilang ban rat dyngkhong ïa ka jingkhaïi drok, ha kaba la khmih lynti ba kane ka rukom treikam kan lah ban rat dyngkhong ïa ki jingsniew, la ong u Director General of Police ka Nagaland, u Rupin Sharma.
Haba kren sha ki nongthoh khubor u Sharma u la ong ba ki Director General jong ki pulit bad ki heh jong ki kynhun pyrshah ïa u drok na baroh ki jylla ka thaiñ Shatei-lam-Mihngi ki la ïakynduh dang shen ban thaw ïa ka buit treikam kaba ïadei pyrshah ïa ki kynhun khaïi drok kiba treikam ha kylleng ka thaiñ.
“Ha ki ar taïew ba la dep, baroh ki DGP jong ki jylla jong ka thaiñ Shatei-lam-Mihngi bad ki khlieh jong ka kynhun pyrshah drok ki la ïawan lang. Ngi pyrshang ban thaw ïa ka buit treikam kaba ïatylli lang ban peit bniah ïa ka jingkhaïi drok,” ong u Sharma.
U la ong ba ka rukom treikam ba la tyrwa kan pynkhlaiñ ïa ka jingïatreilang hapdeng ki bor pynjari aiñ bad kan pynlong ïa ki nongkhaïi drok ban kham eh ban pynpoi ïa ki drok sha kylleng ki pud jong ki jylla.
Katkum ka jingong u Sharma, ki nongkhaïi kiba shalan ïa u drok na Mizoram ne Manipur sha Nagaland kin mad ïa ka jingpeitngor kaba ïatreilang ym tang ha Nagaland hynrei wat ha Assam bad kiwei kiwei ki jylla ba marjan.
Kumjuh ruh kito kiba pyrshang ban thied ïa ki dawai pynbuaid na Assam, Nagaland ne Manipur kin wan hapoh ka jingpeit bniah kaba kham jan lyngba ka jingpynkhlaiñ ïa ka jingïatreilang hapdeng ki jylla.
Halor ka jingïakhun pyrshah ïa ka jingdih drok, u Sharma u la ong ba la don ka jingkiew ha ki bynta jong ka Nagaland hynrei u la ban jur ba ban ïakhun pyrshah ïa ka jingma ka donkam ïa ka jingïashim bynta jong ka imlang sahlang baroh kawei bad ym lah ban ieh tang ha ki pulit.
U la ong ruh ba ki pulit ka Nagaland ki thmu ban buh ïa ki kor ithuh ïa ka dur khmat bad ki kor peitngor, ryngkat bad ki CCTV system, ha ki nongbah kiba heh ban kyntiew ïa ka jingshngaiñ jong ki kynthei bad ban ïarap ban khanglad ïa ki kam runar ha ki jaka paidbah.
U Sharma u la kyntu ïa kito kiba shah thombor bad shah pyndonkam bakla bad ki bahaïing jong ki ban pyntip ïa ki kam runar sha ki pulit, da kaba ong ba ka jingkiew ha ka jingpyntip ka pyni ïa ka jingshaniah jong ki paidbah ha ki bor pynïaid jong ka aiñ.
