Aizawl, Nailur:
U President ka Mizo National Front (MNF) uba dei ruh u Myntri Rangbah barim ka Mizoram u Zoramthanga, u la pynskhem ba ka seng jong u kan sa ïohlad ban wanphai biang ha ka bor synshar ha kaba mynta ka jingpynkhreh ka dang ïai bteng ha ka jylla bad kyntu ïa ki nongbud bad ki nongkyrshan jong ka seng ba kin long kiba ïatylli bad kiba ïaineh ha ka jingthmu jong ka seng.
Haba kren ha ka jingïalang jong ka seng ha Aizawl, u Zoramthanga u la ong ba ka MNF ka la sdang ban buh ïa ka nongrim na ka bynta ki jingïaleh elekshon ki ban sa wan bad ka dang shim ïa ki sienjam kiba donkam ban ïoh biang ïa ka jingshaniah jong ki paidbah hashwa ka elekshon sha ka ïingdorbar thawaiñ ka jylla ban wan kaba la buh ban long ha u snem 2028. Kumba ka long mynta ki heh nongïalam jong ka seng ki dang ïaid shakhmat ban pynsngewthuh ïa ki paidbah halor ki rukom treikam bad ki jingthmu jong ka seng.
“Ka MNF ka dang pynkhreh ïalade ban thaw sorkar biang. Ki sienjam kiba donkam ki dang ïaid ha kata ka liang, bad nga kyntu ïa ki dkhot jong ka seng ba kin ïai long kiba ïatylli, kiba aiti, bad kiba skhem ha ka jingngeit jong ki,” u la ong.
