Shillong, Nailur 15
Ka nongbah Shillong ka la pdiang burom ïa palat 250 ngut ki nongïalehkai badminton (shuttlers) na shi tyllup ka thaiñ na ka bynta ka jingsdang jong ka Yonex Sunrise North East Interstate Badminton Championship 2026, kaba kan sdang ha ka sngi Balang 16 Nailur 2026.
Ïa kane ka jingïalehkai kaba 4 sngi ka ban long ha JN Sports Complex Indoor Stadium, la pynïaid da ka Meghalaya State Badminton Association (MSBA) hapoh ka jingkyrshan jong ka Directorate of Sports and Youth Affairs, Meghalaya bad da ka jingithuh jong ka Badminton Federation of India.
Ïa kane ka jingïalehkai interstate ba hakhmat tam la pynlong ha ka rukom ban bat katkum ka pali ha kine ki phra tyllup ki jylla jong ka thaiñ Shatei Lammihngi (North East). Ka sien ba khatduh ba ka Meghalaya ka la pynlong ïa kane ka jingïalehkai ka long ha u snem 2016, katba ar snem ha dien kata la duh noh namar ka jingban ka khlam Covid-19.
Ka jingwanphai jong kane ka jingïalehkai ha ka thaiñ ka la long ka jingpdiang burom ba kmen bad ba radbah da ki nongïalehkai ba rim bad ba thymmai, kiba kan ai ka lad ïa ki ban tynjuh ïalade bad kiwei pat ki nongïalehkai ba tbit na ka thaiñ Shatei Lammihngi.
Man la ka Jylla, kynthup ïa ka jylla Meghalaya, ki lah ban phah baroh lang ïa ki 34 ngut ki nongïalehkai badminton bad kan don ka jingïalehkai jong ki Under-17, Under-19 bad ki ba la kham rangbah ha ka rukom lehkai ba marwei bad kumjuh ruh da ki kynhun (team), la pyntip u Vice-President jong ka MSBA, u Bah Pynbianglang Laloo. Ki jingïalehkai kin sdang ha ka sngi Balang ha ka por 8 baje mynstep.
Iwei na ki nongshim bynta udei u H Lalthazuala na Mizoram. U la long u nonglehkai national U-17 champion bad u la mihkhmat ïa ka ri India ha ka Badminton Asia Junior Championships ha Indonesia bad ha ka World Junior Badminton Championships ha Guwahati, baroh ar tyllup ha u snem ba ladep.
Ha ka jingwan kaba nyngkong jong u sha Shillong, u Lalthazuala u khmihlynti ban leh bha. “Khlem da sngewsarong, hynrei nga tharai ngi don ka kynhun kaba khlaiñ bha,” u la ong shaphang ka kynhun ka Mizoram ka jylla jong u.
