Shillong, Nailur 16
Ka Ri-Bhoi District Sports Asso-ciation ka la khur ïa ka nam lahduh ha ka Meghalaya State Senior Athletics Championship 2026, kaba la poi sha kaba kut ha ka sngi Balang ha Sports Authority of India (SAI) Training Centre, Shillong.
Ka Ri-Bhoi ka la lah ban khur 9 tylli ki takma ksiar, mar 7 tylli ki takma rupa bad rnong. Ka West Jaiñtia ka la wan ha ka kyrdan ba-ar ha kaba ka la khur 7 ki takma ksiar, 6 ki rupa lem bad 2 ki rnong, katba ka East Khasi Hills ka la wan balai da kaba khur 5 ki takma ksiar, 5 ki rupa lem bad 2 ki rnong.
Ïa ka nam Best Athlete la khur da u Eliam Bonkam G Sangma jong ka South West Garo Hills bad ka Phibakmen Rynghang jong ka Ri-Bhoi. Ïa ka nam Most Promising Athletes la ïoh da u Lastly Suchiang jong ka East Jaiñtia Hills bad ka Monlangki Kyndait na ka West Jaiñtia Hills.
Ha kane ka sngi la ïadon lang ka khlur nongïalehkai barim na Australia, ka Glynis Nunn kum ka kongsan, kumjuh u Working President ka Meghalaya State Olympic Association Bah John F Kharshiing, u Assistant Director Bah Khroobok Passah, ki dkhot ka Meghalaya Athletes Associa-tion bad kiwei kiba la shah khot sngewbha.
Ka Nunn kaba la khur takma ksiar ha ka jingïalehkai Heptath-lon ha ka Olympic 1984, ka dei kaba la don bynta ryngkat ka tnat ïalehkai bad ka MSOA na ka bynta ban sei ïa ki nongïalehkai kiba kynsai sha ka 39th National Games ka ban long ha u snem ban wan.
Na ka shnong rit jong ka Toowoomba, kaba wat haduh kine ki sngi ruh ka don tang 1.5 lak ngut ki nongshong shnong, ka Nunn ka la ong ba lada ka lah ban pynrung ïalade sha ka Olympic, kino kino napdeng ki 267 ngut ki nongïalehkai kiba ïashim bynta ha kane ka lympung ki lah ban kynjoh.
“Nga la sngewkmen eh ban ïohi ïa ki katto katne ki jingïalehkai bha da ki khynnah. Nga wan na ka shnong rit kaba don ha ri nongkyndong, kumta lah ban leh tang lada phi don ïa ka jingaiti lut ha ryngkat ka jingkut jingmut ba phin kynjoh sha ka thong,” la bynrap ka Nunn.
“Ka jingïalehkai bad ka jingïakop ki hikai ïa phi ba phin don ïa ka jingangnud ba phin sa lah ban khur ïa ka jingjop bad kumjuh kan ïarap ban pyni ïa phi ba phin nangkham pynjai shuh shuh ïalade.”
Ha kawei pat ka liang u Bah Kharshiing, u la pynpaw ba ka jingïalehkai ka long kaba kongsan ban ïa kaba khur takma.
“Kham bun ban ïa ki takma, ka dei ka kam kaba ïadei bad ka jingkoit jingkhiah. Kam ju long ka jingpynlut por hynrei ka dei ka jingpynlut por jong phi ha kane ka kam ïalehkai,” u la bynrap. “Nga kyrmen ba ngin nangkiew na kawei ka por sha kawei pat. Nga kyrmen ba phin leit phai sha ki distrik jong phi bad phin pynshlur ïa kiwei pat ban shim bynta ha kane ka jingïalehkai.”
Haba phai sha ka National Games ka ban long ha u snem ban wan, u Bah Kharshiing u la pynpaw ka jingkhmih lynti ba ka Meghalaya kan kiew kham shakhmat bad ban lah ban ïakhun bad kiwei pat ki jylla jong ka ri. Ngi long kiba donbok shibun ban ïoh ïa u Myntri Rangbah bad u Myntri ka tnad ïalehkai kiba dangïai bteng ban bei tyngka ha ka kam ïalehkai.”
