Shillong, Nailur 16
Ka Mawlai SC bad ka Langsning FC ki la ïasam mar shi point ha ka lympung ïalehkai Shillong Premier League 2026, hadien ba kim shym la lah ban thep kol ha ka sngi Balang ha SSA Stadium, Polo.
Kane ka jingïakhaid ka la pynlong ïa ka Mawlai ban dangïai bat ïa ka kyrdan ba hakhlieh bad kamai 11 poiñ na ki san sien ïakhun. Kane ka kynhun ka la ïaryngkat kyrdan bad ka Shillong Lajong, hynrei ka la tam lyngba ka jingïapher ha ka jingthep kol (+7 to +1). Katba ka Langsning ka dangïai sah ha ka kyrdan balai bad 10 poiñ.
Ha ka jingshisha ka Langsning ka la dei ban thep ar kol ha ki san minit ha kaba u Syed Ahmed u la ïoh ban pyndei da ka khlieh lyngba ka corner ba la shut da u Allen Lyngdoh Nongbri. Kum-juh hadien kane ka kynhun ka la ïoh biang lyngba u Ahmed, hynrei um shym la lah ban pynurlong na ka daw ka jingïashah tyngeh uwei na ki rangïalehkai ‘dien ka Mawlai.
Hadien ba la bteng biang ïa ka jingïalehkai jong ka kylla miet, ha kaba ka Langsning ka la dei ban khur 3 poiñ, hadien ba u Samuel Phawa u la ïoh ban shut ïa ka bol kaba la leit dei na diengkol bad u Wadajied Kynsai Ryngkhlem u la lah ban pyndei da ka khlieh ïa ka bol bad ka la her shabar.
Ka jingïalehkai ha ka sngi Palei kan long hapdeng ka Nangkiew Irat pyrshah ïa ka Rangdajied United ha ka por 3 baje nohphai sngi.
