Shillong, Nailur 16
Ka Nongkrem SC ka la khur ïa ka jingjop ha kaba sdang ïa ka lympung ïalehkai 1st Division Football League 2026 ba la pynïaid da ka Shillong Sports Association, hadien ba ka la pynliem noh ïa ka Malki SC da 2-1 kol ha ka sngi Balang.
Kane ka la wan urlong lyngba u Donboklang Kharjana bad u Aiboklang Nongrum na ka bynta ban khur ïa ki lai poiñ.
Ha kane ka jingïakhun kaba la long ha SSA Stadium, baroh ar ki kynhun ki la pyrshang ban ïakhun tyngeh naduh kaba sdang ha kaba kim shym la lah ban thep kol haduh kaba kut jong ka kylla step.
Wat hadien ba la bteng ïa ka kylla miet kine ki kynhun kim shym la kheiñ sting ha kaba ki la pyrshang ban ïoh thep kol khnang ban pynurlong sha ka thong. Hapdeng kane ka jingïakhun, ka Malki ka la ïoh ban pynkhih jar nyngkong eh lyngba u Rangdajied Rynjah ha ka minit kaba 75.
Hadien lai minit ka Nongkrem ka la lah ban pynphai kylla lyngba u Donboklang Kharjana. Kane ka kynhun ka la thep biang sa shi kol lyngba u Aiboklang Nongrum (87) na ka bynta ban khur syndon ïa ka jingjop.
Nalor ka Malki bad ka Nongkrem, kiwei pat ki kynhun kiba don ha ka Group-A ki long ka Laitkyrhong, Mawtawar bad ka Nongthymmai, katba ha ka Group-B ki long ka Nongrim Hills, Mylliem Lum Sports Association, Pohkseh, Ryntih bad ka Mawkhar.
Katkum ka prokram ïalehkai la ong ba ki ar tylli ki kynhun ki ban wan ha ki kyrdan ba nyngkong bad ba ar napdeng kine ki group kin ïoh rung sha ka semi final, katba ki ar tylli ki kynhun ki ban wan shatrai napdeng kine ki ar tylli ki group kin hap ban ïaknieh lait hiar (bottom league).
Ka jingïalehkai ha ka sngi Palei kan long hapdeng ka Laitkyrhong pyrshah ïa ka Mawtawar ha ka por 12:15 mynsngi.
