Jowai, Nailur 16
Ka prokram ai jinghikai volleyball kaba ar sngi ba la pynlong da ka West Jaiñtia District Volleyball Association (WJDVA) ka la sdang ha ka sngi Balang ha North East Adventist University.
Kane ka jinghikai ka long na ka bynta kito kiba sngewtynnad ïa kane ka jingïalehkai bad ruh ïa ki rephri ban tip halor ki kyndon ïalehkai ha kaba la shim bynta da ki 14 ngut na East Jaiñtia Hills bad West Jaiñtia Hills.
Ha kane ka prokram la wan ai jinghikai da u Sports In-charge ka NEA University hapoh ka jingpeit u Alban Presley R. Sangma. Ha kane ka sngi sdang ki nongshim bynta ki la ïoh jinghikai halor ka theory, katba ïa ka practical yn sdang lashai ka sngi.
U President ka WJDVA u Bah Lammatoo Laloo ula kren halor ka jingthmu jong ka synjuk ban pynlong ïa kane ka prokram ai jinghikai halor kane ka jingïalehkai. U la pynpaw shaphang ka jingmyntoi jong ka na ka bynta ki riew ïeid ïa kane ka jingïalehkai bad ban kyntiew ïa ka volleyball ha ka distrik.
