Shillong, Nailur 16
Ka O.M Roy Memorial Higher Secondary School ka la mad ïa ka jingshah rem ha ka CBSE da 2-1 kol ha ka sngi kaba ar jong ka lympung ïalehkai 65th Subroto Cup International Football Tournament 2026, kaba la long ha sngi Balang ha New Delhi.
Watla kane ka kynhun ki rangïalehkai Under-17 kaba la mihkhmat ïa ka Jylla ka la jop da 8-0 kol ïa ka kynhun na Uttar Pradesh ha ka sngi Ba-ar, hynrei mynta ka la mad ïa ka jingshah rem kaba nyngkong eh ha kane ka lympung.
Kumba ka paw kane ka jingïalehkai ka la long kaba ïakhaid bha ha kaba baroh ki la pyrshang ban ïakhun tyngeh naduh kaba sdang, hynrei ka OM Roy ka la lah ban thep tang shi kol lyngba u kapten u Nameshaphrang Pdahkasiej hashwa ba kan mad ïa ka jingshah rem.
Te kumta kane ka kynhun ïalehkai kaba na Mawlai Kyntonnassar ka donkam ba kan ïalehkai bha ha ki ar tylli ki jingïakhun kiba dangsah jong ka Pool-A kata pyrshah ïa ka Delhi ha ka 18 tarik bad ïa ka Andaman & Nicobar ha ka 19 tarik.
