Shillong, Nailur 17
Ki pulit ka Jylla ki la pynjur bha ïa ka jingpahara ha baroh kawei ka Nongbah Shillong hadien ba saw sien la shah kawang petrol bomb ha ki ophis Sorkar bad ki Police Station.
U Superintendent of Police (SP) EKH ba dei khmih ïa ka Traffic, u Hari Prasanth MR u la ïathuh ba ka jingshah wiang ding ka la jia ha DMR ha ka sngi Balang jong ka taïew, ha ka por kumba 3:30 eiei janmiet, ha Thanad Lumdiengjri ha ka por 9:45 mynmiet bad ha ka step sngi Palei la shah wiang ding ka kali Bolero ha DHS por 3 baje mynstep bad ka Traffic Beat House Nongmensong ha ka por 3:30 mynstep.
“Ki jingjia jong ka jingwiang ding ki la jia, kawei ha DMR bad nangta kawei ha Thanad Lumdiengjri, kawei ha DHS bad kawei pat ha ka jingshah wiang ding ka Traffic Beat House ha Nongmensong,” u la ong.
U la ong ba la pynjur bha ïa ka jingpahara ban ïaid kylleng-kylleng bad ka jingpeit bniah bha khamtam ha ki ophis Sorkar.
“Ngi la shim ïa ki lad ki lynti, ngi la pynbun ïa ki pulit pahara ban ïaid kjat, ngi la phah ban peit bniah ïa ki kali jong ngi ruh. Ngi la leit ruh sha baroh ki ophis bad ngi la bthah ïa kiei ki jingdonkam, kumta ngi la kham pynkhreh bha mynta ban ïa ki sngi ba la dep, ban phah pahara.” U la bynrap.
U la ong ruh ba ka jingtohkit ka dangïaid shakhmat.
“Ngi dangpeit bniah ïa baroh ki dur CCTV, ngi dang eksamin ïa kita baroh. Ngi la khot katto katne ngut ki briew bad ngi la tohkit ïa ki. Ngi la lap ba katto katne ngut ki briew kiba donkti ha kane ka kam,” la ong u Hari Prasanth.
