Shillong, Nailur 17
Ka Hynñiewtrep Youths’ Council (HYC) Mawphlang Unit ha ka 17 tarik u Nailur 2026, ki la leit ban khynra ïa ki bar jylla ha ïew Mawngap, ki bym don kot don sla, kiba wan shong dukan ha kitei ki jaka.
Ha kane ka jingkhynra, ka HYC ka la lap ïa ki bar jylla kiba wan na UP, kiba buh dukan khap shñiuh ha ïew Mawngap, khlem ki kot ki sla kiba biang. Katei ka dukan kadei kaba la slem bha, hynrei haba pan ïa ki kot ki sla kim shym la don satia.
Haba kren sha ki lad pathai khubor, ki nongïalam ka HYC ki la ïathuh, ba shuwa kane, ki la dep ban khynra teng bad ai por ba kin pynbiang noh ki kot ki sla, hynrei haduh mynta kim shym la pynbiang, kumta ki la beh krad noh ïa kitei ki bar jylla.
Ki la bthah ruh ba kim shah shuh ïa kitei ki bar jylla ban wan leh kino-kino ki kam ha ka thaiñ, namar kumba ka long mynta shibun ki samla ka dong ka thaiñ, ki la lah lut ban trei ïa kum kine ki kam.
“Balei ngin shu shah ïa ki nongwei ba kin knieh noh ïa ka pliang ja, kiba ki samla ka thaiñ ki danglah ban trei,” ki la ong.
Ki dkhot bad nongïalam ka HYC ki la khang khyrdep shi syndon ïa katei ka dukan ki bar jylla ha ïew Mawngap.
