Shillong, Nailur 17
U Symbud Myntri Rangbah ba khmih ïa ka tnad Kam Pohïing Bah Prestone Tynsong ha ka sngi Palei u la pyntip ba ka Sorkar Jylla kala dep pynbeit ïa ka jingïakajia halor ka jingkynnoh wan lum khana samari ka Assam ha Langpih.
“Ïa kane ka kam la dep ban pynbeit. Ha kano-kano ka jaka ba ka Sorkar Jylla kala dep lum ïa ka khana samari, ngi la ïakren bad ka Sorkar Assam, ba kam dei ban pynthut shuh bad kila leh ïa kata,” u la ong.
U ïathuh ba kum kane ka jingjia kala jia ruh ha Mukroh bad ïa kane ruh la dep ban pynbeit.
“Kum kane ka juh ka jingjia kala jia wat ha Mukroh bad ngi la dep pynbeit ïa ka,” u la ong haba bynrap ba ka Sorkar kala bthah ïa u Chief Secretary ban ïakren mardor haba don kum kine ki jingujor bad u Chief Secretary ka Assam.
“Ngi sngew kmen ban pyntip ba wat na ka liang ka Assam kila ai ka jingïatreilang haba mih kum kine ki jingbym ïasngewthuh jingmut,” u la bynrap.
