Nongpoh, Nailur 17
Ka Ri Bhoi District Sports Association (RBDSA) ka la pynkup burom ïa ka kynhun ki nongïalehkai kane ka district mar ïawanphai sha la ïing hadien ka jingïoh rah ïa ka nam lahduh ha ka Meghalaya State Senior Athletics Championships 2026, kaba la poi sha kaba kut ha ka sngi Balang ha nongbah Shillong.
Ïa kitei ki 23 ngut nongïalehkai ba kynthup lang ïa ki coach u Bah Sylvester Lyngdoh bad u Bah Shanbor Syngkli, la pdiang burom ha phyllaw jong ka shlem treikam katei ka synjuk kaba don ha Umsning ha ka jingsakhi lang ki nongkitkam ka RBDSA lem bad kiba haïing hasem jong kitei ki nongïalehkai.
Kum ban shu kdew hangne, ka Ri Bhoi District ka la ïoh ban khur haduh 23 tylli ki takma ha katei ka lympung kaba la neh lai sngi kynthih ba kynthup ïa 9 tylli ki takma ksiar, 7 ki takma rupa lem bad 7 tylli ki takma rnong bad ïoh ban rah syndon ïa ka nam lahduh.
U Bah P.S. Nongrum, Acting President ka RBDSA, u la pynpaw ïa ka jingsngewkmen bad jingsarong halor kane ka jingjop jong ki nongmareh ka Ri-Bhoi kiba la aiti met bad mynsiem. U la pynkynmaw ruh ba hashuwa ba ki nongmareh kin mih na ka district ban leit shim bynta ha katei ka lympung, ka synjuk ka la ai khublei kitbok kitrwiang ryngkat ki jingkyrkhu kyrdoh ïa ki bad pynpaw ïa ka jingsngewkmen ba katei jingai mynsiem ka la urlong.
U Bah Nongrum u la ai jingïaroh ïa baroh ki nongmareh kiba la lah ban wanrah burom ïa ka district. U la pynpaw ba ka RBDSA kan dangïai bteng ban trei shitom ban sei ïa ki sap jong ki nongïalehkai bad ban kyntiew shuh shuh ha kane ka jingïalehkai.
