Shillong, Nailur 17
Ki ar ngut ki shipara na ka kur Kharbuki, u Raynell bad u Gavin Kharbuki ki la jam sha ka quarter final, katba ka kynhun ïalehkai ka Assam ki la sar lut baroh na ka bynta ban rah ïa ka nam lahduh ha ka jingïalehkai kynhun jong ka North East Zone Inter-State Badminton Championship 2026, ha ka sngi Palei ha JN Indoor Stadium, Polo.
Ha ka jingïakhun final jong ka ‘boys team event’, ka kynhun ki rangïalehkai ka Assam ka la pynliem ïa ka Arunachal Pradesh bad ha ka men’s team final pat, ka Assam ka la pynliem ïa ka Manipur, katba na ka liang ki kynthei, ka kynhun ïalehkai ka Assam ka la pynliem noh ïa ka Mizoram.
Haba phai sha ka sngi kaba ar jong kane ka lympung, ka kynhun ïalehkai ka Meghalaya, ki la lah ban khur jingjop, ha kaba ka Netania T Tariang ka la pynliem ïa ka Choying Tsepel Tamang na Sikkim da 15-2, 15-3 ha ka kyrdan ïakhun jong ka girl’s U-19, katba ka Sneha Chetri ka la shah rem noh ha ka ‘thei ïalehkai na Mizoram ka Lalnunhluni da 15-12, 15-13.
Katba u Raynell u la lah ban pynliem ïa u Porvash Prasad na Sikkim da 15-4, 15-10, bad u Gavin pat u la jop ïa u Lalpekhluzuala na Mizoram da 15-6, 10-15, 15-7.
Haba phai sha ki jingïakhun final jong ka team event, ki khynnah ka Assam ki la lah ban pynliem da 2-0 ïa ka Arunachal Pradesh bad ki khynnah kynthei pat ki la lah ban pynliem ïa ka Mizoram da 2-1.
Katba ha ka kyrdan ïakhun jong ka men’s bad women’s team event, ki rangïalehkai ka Assam ki la pynliem noh ïa ka Manipur da 3-1, bad na ka liang ki kynthei ki la jop da 3-0 ïa ka Mizoram. Ha lyndet kane ka jingjop jong ka Assam ka la wan lyngba ka ‘thei bna nam ka Ashmita Chaliha, kaba la khur takma ksiar ha ka 2024 Asia Team Champion-ship 2024.
