Shillong, Nailur
U khlieh nongïalam ka United Democratic Party (UDP), u Bah Metbah Lyngdoh ha ka Sngi Balang u la ong ba ka seng kan sa pyrkhat halor ki sienjam ban shim haba ïadei bad uwei na ki MLA jong ka, halor ki jingkynnoh kam pyrshah seng hadien ki jingkren ba dang shen jong u – kaba buh jingkylli ruh ïa ki kam nongïalam hapoh ka seng.
Haba kren sha ki lad pathai khubor mynta ka sngi, u Bah Metbah u la ong ba ka seng ka la shimkhia haba ïadei bad katei ka jingkren.
“Uwei na ki MLA ka seng u la ai ka jingkren kaba long pyrshah ïa ka seng bad ngi la shimkhia ïa kane bad ngin sa shong ban peit kaei ka rai kum ka seng ngin sa shim ha ka por kaba biang,” u la ong.
Haba jubab, u President ka UDP u la ong, “Ngam donkam ban jubab ïa kata ka jingkylli. Kan bha ba kiwei kin leh ïa kata na ka bynta jong nga, lehse kan long kaba dei. Na ka bynta jong nga, ban kren kyntiew ïalade, nga tharai ba kiwei kin ym sngewtynnad bad nga ruh nga ju kiar na kaba leh ïa kine ki jait kam.”
Shuh shuh, u Bah Metbah u la bynrap, “La kum u President jong ka seng ne kum u MLA jong ka konstitwensi, la kum u Myntri jong ka Sorkar, kano-kano ka bynta bad jingkitkhlieh ba la aiti ha nga, ngan pyntikna ba ngan pyndep ïa ka kam ban pynurlong ïa ka jingkhmih lynti jong ki paidbah ha la ka bor kaba nga lah, ryngkat bad ka tnad bad ka Sorkar.”
