Shillong, Nailur 17
Ka United Democratic Party (UDP) ha ka Sngi Palei ka la pynpaw ba ka lah ban phah Show Cause Notice sha ki 8 ngut ki MLA kiba la mih kyrteng ba ki lah ban ïehnoh ïa ka party bad thmu ban kyntiap sha ka Bharatiya Janata Party (BJP).
Haba kren u Bah Titostarwell Chyne, General Secretary UDP u la ong ba halor ka khubor ba thmu kyntiap seng ki MLA, u la ong ba kum ka party ka la pynkhreh ban shong da ka jingïalang jong ka Disciplinary Committee bad ka State Parliamen-tary Board (SPB) ban shim ïa ka rai kaba biang.
Shuh-shuh u la ong ba kum u General Secretary um lah ban shu shim rai marwei ban sospon ïa kine ki MLA, hynrei ka Party kan hap ban shong jingïalang bad pynpaw ba un ym pat lah ban ong eiei ïa mynta, hynrei ka Party kan sa shim ïa ki sienjam kiba dei bad lehse kan phah da ka Show Cause Notice ïa ki.
U Bah Titos u la ong ruh ba kumba ka long mynta ki khubor kiba la mih ki dang dei tang ki jingantad, namar kine ki MLA kim pat ïehnoh lane kim pat pynïasoh pura sha kiwei ki Party, kumta ki dang dei hi ki MLA ka UDP bad ki dang don ha ka UDP.
Haba kylli halor ka daw jong kane ka jingthmu pynïasoh ki MLA sha kiwei ki Party, u Bah Titos u la pynshai ba um tharai ba ka jingthmu jong ki ban leit sha ka BJP ka dei na ka daw jong ki nongïalam Party, hynrei kan dei pynban na ka jingkwah shimet jong ki.
U la bynrap ba ka Party ka dang ïatylli bad lada don u MLA u ba pynïasoh marwei sha ka BJP, kan dei ka jingrung jong u hi marwei ym jong ka Party, u la pynkynmaw ruh ba bunsien ki MLA ki la ju mih na ka Party ha ki por kiba leit, hynrei da ki mih ruh ka UDP ka dang lah ban jop bad ïoh da ki MLA kiba thymmai.
Kumba ka long mynta, ki 8 ngut ki MLA kiba la mih kyrteng ba thmu ban mih na ka UDP ki kynthup ïa u Bah Lahkmen Rymbui, MLA Amlarem, u Bah Kyrmen Shylla, MLA Khliehriat, u Bah Balajied Kupar Synrem MLA Shella, u Bah Synshar Kupar L Thabah MLA Sohïong, u Bah Pius Marweiñ MLA Ranikor, u Bah Mathew Beyondstar Kurbah MLA Mawphlang, u Bah Mayralborn Syiem MLA Nongpoh bad u Bah Ollan Sing Suiñ MLA na Mawsynram.
