Shillong, Nailur 18
Ka All Meghalaya Progressive Muster Roll Workers’ Union (AMPMRWU) ha ka sngi Palei ka la pynbna ïa ki nongïalam ba thymmai jong ka bad ka la ai burom ïa ka Sorkar kaba la lah ban pynbeit ïa ki jingdawa kiba la sahteng.
Haba pynbna ïa kane, u President ka AMPMRWU u Bah Nazarius K Lanong u la ong, “Ngi kwah ban pyntip sha phi ba ngi la ïoh ïa ka EC ba thymmai jong ka All Meghalaya Progressive Muster Roll Workers’ Union ha ka 4 tarik Nailur 2026. Ngi la ïoh ruh ïa u Adviser ba thymmai, u Bah Ervin K Syiem Sutnga.”
Haba ai khublei ïa ka Sorkar, u Bah Lanong u la ong, “Ngi ai khublei ïa u Myntri Rangbah ka Jylla u Conrad K Sangma, uba la sngap ïa ki jingdawa jong ngi, kumjuh ruh ngi ai khublei ïa baroh ki heh Sorkar kiba don ha ki tnad treikam bapher-bapher.”
U la ai burom ïa ka Joint Action Committee (JAC) kaba la thaw lang da ka seng jong u bad ka All-Jaiñtia Muster Roll, kaba la ïaibteng ban buddien ïa ki jingdawa bad ruh u la ai khublei ïa ki Chairperson, ki Chairman bad baroh ki dkhot jong ka.
U la ïaroh ruh ïa ki tnad District na ka bynta ka jingtrei jong ki, da kaba ong, “Ngi ai khublei ïa ki tnad bapher-bapher kiba don ha ki District namar dei lyngba ka jingtrei shitom jong ki, ba la pdiang ïa ka jingïalap jong ngi na kawei ka District sha kawei pat ka District bad ba ngi la lah ruh ban pynbeit bad pynlong ïa ki jingdawa jong ngi ban sngap bad ban pynurlong ïa ki.”
