Shillong, Nailur 18
Ka Meghalaya College Teachers’ Association (MCTA) hynne ka sngi ka la dawa na ka Sorkar Jylla, ban pyndap ïa ki kam ba thylli jong ki nonghikai bad ha kajuh ka por ban siew tulop ïa ki katkum ka UGC pay scale.
Haba kren sha ki lad pathai khubor u President ka MCTA u SK Pradhan u la ong ba ka MCTA ka kyrshan ïa ki nonghikai skul Deficit Grant-in-Aid, kiba dang ïakhun ban pyrshah halor ka Structured Pay Framework (SPF) bad ong ba ki nonghikai College ruh ki ïeng ryngkat bad ki.
U Pradhan u la pynpaw ka jingsngewkhia halor ki kam nonghikai kiba dang thylli ha ki kolej bad u la kam ba katkum ka jingwad bniah, ki don 488 tylli ki kam nonghikai kiba la sanction kiba thylli bad haduh mynta ka Sorkar ka dang dep ban pyndap tang 133 tylli ki kam nonghikai.
U la dawa na ka Sorkar ba kadei ban pyndap noh kloi khnang ba ki kolej kin lah ban ai ka jinghikai kaba biang bad pyndep ïa ka syllabus jong ka fourth year ki samla pule.
U Pradhan u la pynpaw ruh ha kaba dei bad ka jingdon jong ka degree kaba dei 4 snem “fourth year” hapoh ka NEP 2020 ka la nang pynkiew ïa ki jingdonkam nonghikai ha ki kolej bad ka MCTA la pynpaw ba lada ym pyndap kloi ïa ki post kiba dang lait kiba bun ki kolej kin shem jingeh ban sdang ïa ka jingpule fourth year.
“Lada ym lah ban pyndap ïa ki kam nonghikai ba thylli, ki samla kiba la rung ban pyndep ïa ka degree ha ki saw snem ruh ki lah ban shah ktah lada ki College kim lah ban pynbiang ïa ki nonghikai bad ki jingdonkam” la ong u Pradhan.
Ka kynhun ka la pynpaw ruh ba ki nonghikai UGC Scale kumba long mynta ki ïoh ïa ka Basic Pay bad Dearness Allowance (DA), katba kiwei pat ki allowances ki dang don ha ka jingïakren. Ka MCTA ka dawa ïa ka Sorkar ba ki nonghikai kiba la pyndep ïa ki kyndon dei ban ai kloi ïa ka UGC Scale.
Ha kaba ïadei bad ka Centralised Provident Fund (CPF) na ka liang u Joint Secretary U Dr. P Sarkhel Associate Professor St.Edmund uba peit ïa ki mat aiñ jong ka MCTA, u la batai ïa ka jingïaid lynti jong ka mukotduma bad ki jingpyrshah jong ka kynhun MCTA ka long ba ka MPF Act 1969, ka Centralised Provident Fund (CPF), ka NPS bad ka Board of Trusted kidei ki bynta kiba kongsan ha kane ka mat.
U la ong ruh ba kum ka kynhun ki la pyrshah ïa ka Scheme 2026 bad ka la shim ïa ki lad ha kaba ka aiñ ka don, khamtam hadien ba ka High Court ka la ai ïa ka lad ban pynsngew ïa ki jingpyrshah jong ka MCTA.
Ka MCTA ka ong ba ka thong jong ka, ka long ban ïada ïa ka jingshngain ha ka por shongthait “retirement security” jong ki nonghikai bad nongtrei kiba don hapoh ka deficit grant-in-aid system, bad ban pynthikna ba ka rukom treikam jong ka CPF kan long kaba shai bad kaba ïahap bad ka aiñ.
