Shillong, Nailur 18
Ka Seng Samla Shnong Laitkor Pyllun, ha ka sngi Thohdieng ka la rakhe ïa ka jingdap 17 snem jong ka, ha kajuh ka por ka la pynkup burom ruh ïa ki 38 ngut ki samla pule kiba la pass bha ha ka SSLC bad HSSLC jong u snem 2025 bad 2026.
Ha kane ka sngi ka Seng Samla ka la pynskhem ïa ki nongïalam ba thymmai na ka bynta ka samoi treikam 2025 haduh 2030, ïa ka kam President la bat da u Bah Michael Wanshong, Vice-President ïa u Richmond Richard Mawrie, Secretary Bah Ordrin Kharkongor, Asst-Secretary Bah Pynskhemboklang Dkhar, Finance Secretary Bah Bonniefast Mawrie, Social Secretary Bah Ksanbor Kharkongor, Sports Secretary Bah Bankerlang Mawrie, Educational Secretary Bah Godrikson Kharbani, Publicity Secretary Bah Sylvester Nongkhlaw, Chief Adviser Bah Johnystar Mawrie bad Organising Secretary Bah Worries Mawrie.
Ha kane ka sngi la wan ban long kongsan da u MLA barim ka Nongkrem Constituency u Bah Lambor Malngiang ha kaba u la ai jingkren ryngkat ki kyntien kyrkhu kyrdoh ïa ki samla pule ba kin dang ïai bteng ban minot ha ki jingpule ba kham shalor khnang ba ka lawei jong ki kan long kaba phyrnai.
U la pynkynmaw ba ha ki snem kiba la dep ha ki por ba u dang long kum u MLA jong katei ka Constituency, kum u MLA u la pynlong ïa kiba kum kitei ki jingpynkup burom ïa ki khynnah pule kiba la lah ban leh bha ha ki eksam bapher-bapher la ki dei na ka MBOSE lane CBSE.
U la ai ki kyntien kyrkhu kyrdoh ïa ki khun samla kiba la ïalam bad ba la pyntyllun ïa ki kam jong ka Seng Samla ban trei ki kam ba bha bad ban ai mynsiem ïa kiwei kiba don hapdeng ki jingpule bapher-bapher.
