Nongstoiñ, Nailur 18
Ka jingnang jyllei jong ki nongkhaiï kyiad be-aiñ ha ki bynta ka shnong New Nongstoiñ, West Khasi Hills District bad halor ka jingïaleh pyrshah jong ki katto-katne ngut ki nong-khaïi kyiad be-aiñ ïa ki dkhot jong ka Seng Long-kmie bad ïa ki ‘Volunteer’ shnong haba ki leit ban pynlong ïa ka jingkhynra bad peitngor ïa ka shnong ka thaw, ka la pynlong ïa ka Seng Longkmie New Nongstoiñ ba kan sngewkhia jur haba ïadei bad kane.
Ka Kong A. Kharsyntiew, Secretary ka Seng Longkmie haba kren halor kane ka bynta ka la pynpaw ïa ka jingsngewkhia kaba jur namar ka jingnang jyllei jong ki nongkhaïi kyiad be-aiñ ha ka shnong New Nongstoiñ.
Ka la pynpaw ruh ïa ka jingsngewkhia halor ka jingpynkylla ‘Wine Store’ jong ki nongkhaïi kyiad be-aiñ ïa la ki jong ki kali, la ki long ki kali kamai ne ki kali shimet kaba la i-saitmet namar ki pynlong dukan ‘Wine Store’ ïa ki kali bad ïeng pathar ha ki surok kaba la pyn-isih bad pynthut ruh ïa ka ïaid ka ïeng jong ki paidbah.
Ka Kong Kharsyntiew ka la kyntu ruh ïa ki ‘riew shimet ne ki nongïalam shnong ne ki kynhun seng kiba don ka jingmut ban tei ïa ka imlang-sahlang ba kin sngewbha ban wan shakhmat ban ai ka jingïatreilang bad ka Seng Longkmie ban pynduh jait ïa ki jingsniew.
Shuh shuh ka la kyrpad ïa ki nongkhaïi kyiad be-aiñ bad nongkhaïi drok ba kin ym leh shuh ïa kum kitei ki kam be-aiñ hynrei kin wad noh da kiwei ki kam ban lait na ka jingjyllei ki jingsniew hapoh Nongstoiñ.
