Guwahati, Nailur:
Ki la don lai ngut ki kynthei na Bangladesh bad uwei u shynrang na India, uba la long kum u nongïarap ïa ki, ki la shah kem ha ki pulit ka Tripura ha kad liengsuiñ Maharaja Bir Bikram ha Agartala hadien ba ki la lap ba kim don ïa ki kot ki sla kiba biang ban pynshisha ïa ka jingwan rung beaiñ jong ki sha India.
Katkum ka jingong jong ki pulit, ki briew na ka Agartala Airport Police Station ki la poi sha katei ka kad liengsuiñ hadien ba la ïoh jingtip shaphang saw ngut ki briew, uwei u shynrang bad lai ngut ki kynthei, kiba ïaid lynti ha kaba la isuba sniew ha katei ka jaka.
La kem bad tohkit ïa kitei ki saw ngut, ha kaba la kynnoh ba kitei ki lai ngut ki kynthei ki la ïathuh ha ki nongtohkit ba ki dei ki nong Bangladesh. Une u briew u dei uba la tip kyrteng kum u Mazarul Islam uba shong ba sah ha Jatrapur ha Sepahijala distrik jong ka Tripura.
Ki pulit ki la ïathuh ba kitei ki kynthei kim shym la lah ban pyni ïa ki kot ki sla kiba biang kiba ai bor ïa ki ban rung sha India.
Ki nongtohkit ki la kynnoh shuh shuh ba u Islam u la ïalam ïa kitei ki lai ngut ki kynthei sha Guwahati lyngba ka kad liengsuiñ Agartala.
Hadien kata la rah ïa kitei ki saw ngut sha thanad bad la buh jingmudui pyrshah ïa ki.
Ki pulit ki la ithuh ba kitei ki lai ngut ki longkmie ki dei ki nongshong shnong jong ka Khulna distrik ha Bangladesh bad ki la ong ba ka jingtohkit ba nyngkong ka la pyni ba ki la kynnoh ba ki la wan rung sha India lyngba u khappud Sonamura ha Sepahijala distrik.
Ki nongtohkit ki la ïathuh ba kitei ki kynthei ki la kam ba ki la wan sha India ban wad kam wad jam, watla ym pat lah ban tip ïa ka jingthmu bad jinglong jingman ba thikna jong ka jingrung jong ki.
La pyni ïa u Islam hakhmat ka ïingbishar ha ka sngi Thohdieng, ha kaba ki pulit ki la pan jingbit ban set phatok san sngi ban tohkit bniah shuh shuh.
Ki pulit ki la ïathuh ba ka jingtohkit ka dang ïaid shakhmat ban lap kumno la pynsuk ïa katei ka jingrung beaiñ kaba la kynnoh bad hato kiwei pat ki riew shimet ki donkti ha katei ka kynhun kaba la shah suba.
