Shillong, Nailur 18
Ka Hynñiewtrep Integrated Territorial Organisation (HITO) Border Area Dawki Circle, ka la buh da ka jingujor ha u Officer Incharge, Dawki Police Station, WJH, halor ka jingpynïeng ki trok ha ka lynti, ha LPAI Dawki, kaba wanrah ïa ka jingdheng kali kaba neh bun kynta bad kaba khanglad wat ïa ki ambulance ruh, ban ïaid.
Ka HITO ka pynpaw ba ka la buh jingeh kaba khraw kaba jia man ka por halor ka jingpynïeng ki trok harud ka lynti kaba leit sha Land Ports Authority of India (LPAI), Dawki, kaba la wanrah ïa ka jingdheng kali kaba jur bad kaba neh slem.
Ka HITO ka ong, ba ka rukom pynïeng kine ki kali trok rit ne kiba heh harud jong kane ka lynti, ka la wanrah ka jingeh kaba khraw ïa ki paidbah, ki nongshong shnong, ki khynnah ba leit skul, leit kolej, ki nongpang, ki kali kit mar, bad baroh ki nongleit nongwan kiba pyndonkam ïa katei ka lynti.
“Kaba kham pynkhuslai shuh shuh ka long ba ha ki por ka jingdheng kali kaba jur, wat ki ambulance bad ki kali ai jingïarap ha ki por kyrkieh ruh ki ju shah khanglad kaba lah ban buh jingma ïa ka jingim bad ka koit ka khiah jong ki briew,” la ong ka HITO ha ka kyrwoh.
Ka HITO ka la pyntip ruh ba ka don ka durkhih kaba ki la ïoh pdiang kum ka seng, kaba pyni sakhi ïa ka jingdheng kali bad ka jingkhapngiah jong ka lynti na ka daw jong ka jingpynïeng ki trok, kynthup ruh ïa ka jingeh jong ki kali kiba pyrshang ban ïaid lyngba kane ka bynta jong ka surok.
Halor kine ki mat, ka HITO ka la kyrpad ïa u OC ban shimkhia halor kane ka jingujor bad ban shim ïa ki sienjam kiba kyrkieh, ban jurip ïa ka rukom pynïeng kali heh ha kane ka surok, khnang ba kan ym don kano-kano ka jingpynthut ïa ka leit ka wan jong ki nongïaid lynti, khamtam ïa ki kali kiba long kyrkieh, kum ki ambulance bad kiwei-kiwei de.
