Shillong, Nailur 20
Ka Yonex Sunrise North East Zone Inter-State Badminton Champion-ship 2026 ka la poi noh ha kaba kut ha ka sngi Saitjaiñ ha Indoor Stadium jong ka JN Complex Polo, ha kaba ka kynhun ïalehkai ka Assam ka la khur kham bun tylli ki takma, bad la bud sa ki nongïalehkai na Mizoram, Manipur bad Arunachal Pradesh.
Ha kane ka kynti, ka kynhun ïalehkai ka Assam ka la lah ban ïoh khur san tylli ki takma ha ka jingïakhun para marwei, bynrap pat ka Mizoram, Manipur bad Aruna-chal Pradesh kiba la khur mar ar bad kawei ka takma.
Kumban shu pynkynmaw ba ha ka sngi Palei jong ka taiew, ka Assam ka la lah shwa ba kan khur lut ïa ka nam lahduh ha ka kyrdan ïalehkai kynhun (team championship) jong ki kynthei bad shynrang bad bynrap lang da ka jingïoh khur nam lahduh ha ka kyrdan ïakhun jong ka U-19 kynthei bad shynrang.
Ïa kane ka lympung ïalehkai ba saw sngi, la pynlong da ka Megha-laya State Badminton Association (MSBA) ha ryngkat ka jingkyrshan lang da ka tnat ïalehkai ka Sorkar Jylla bad ba la wan ban pynïaid da ka Badminton Association of India.
Ka Kongsan ha ka sngi pynkut ka dei ka Director General of Police ka Jylla, Kong Idashisha Nongrang (IPS), ha kaba ka la ïoh ban sakhi ïa ka jingïakhun phainal ba shi jur (doubles) jong ki shynrang ha kaba ka Assam ka la jop ïa ka Arunachal Pradesh.
Kane ka lympung ïalehkai kaba saw sngi, ka la lah ban lum lang haduh 270 ngut ki rang ki ‘thei ïalehkai bad kumjuh ki khynnah ki Jylla ka thain shatei lammihngi ka ri.
La sdang ïa ka sngi pynkut da ka jingïakhun phainal kaba dei na bynta ka kyrdan ïalehkai U-19 ki khynnah kynthei ha kaba ka Gargi Saikia ka la pynliem noh ïa ka para ba ïalehkai lang ka Assam ka Noimikha Saikhia da 15-3 bad 15-9.
Hadien kane la byhrap pat sa ka phainal ka U-19 ki khynnah shynrang ba la ïakhun biang hapdeng ki arngut ki khynnah ka Assam, ha kaba u Pragan Choudhury u la lah ban pynliem noh ïa u Arnav Protim Borgohain da 15-9, 15-10.
Katba ha kiwei pat ki jingïakhun ka U-19 ki nam jop la khur da kiwei pat ki jylla ha ka jingïakhun ba shi jur ki khynnah shynrang, ka nam jop ka leit sha ki shi jur ki rangïalehkai ka Arunachal Pradesh u Manku Taku bad Gyurmey Tseten kiba la lah ban pynliem noh ia ki shi jur ki nongïalehkai ka Mizoram u Malsawmhlua bad Vanlalhruaia Sailo da 15-7, 10-15, 16-14.
Katba ka resol ha ka jingiakhun ba shi jur ki khynnah kynthei, ka nam jop ka leit sha ka kynhun ïalehkai ka Mizoram ba la mih-khmat da ka Lalrinhlui Hmar bad Zoramthari Renthlei kiba la pynliem noh ïa ki ‘thei ïalehkai ka Assam ba la mihkhat da ka Avikaa Borgohain bad Bhavishya Changmai da 15-13, 13-15, 15-8.
Ha ka mixed doubles, u Vanlalpekhlua bad ka Lalrinhlui Hmar ki la pynliem noh ïa ki shi jur ki nongialehkai ka Manipur u Truman Kalo bad ka Konsam Gunjan da 16-14, 15-11.
Haba phai sha ka mixed doubles jong ki senior, ki shi jur ki nongialehkai ka Manipur u M Hemam bad u P Konjengbam ki la pynliem ia ki nongialehkai ka Assam ba la mihkhmat da Swarnaraj Bora bad Bhavishya Changmai 15-10, 12-15, 15-8.
Katba ha ka jingiakhun ba para marwei ki kynthei, ka Avikaa Borgohain na Assam ka la pynliem noh ia ka Lalrinkimi na Mizoram da 15-11, 9-15, 15-12, katba ha ka liang ki shynrang, u Himanish Das u la pynliem ia la u para ba ialehkai ka Assam u Orijit Chaliha da 15-17, 15-9, 15-12.
Ha kaba kut jong kane ka lympung, ka kynhun ki nongïalehkai ka Meghalaya ki la ïoh ban khur 4 tylli ki takma rnong ba la wan lyngba ka Elsarica Umdor (women’s singles), Netania T Tariang (girls’ singles), u Netania bad Gavin Kharbuki (U-19 mixed doubles) bad Gitchiak Bregim A Sangma bad Sonnal Joshi (senior mixed doubles).
Kine ki saw tylli ki takma ïa mynta lah ban ong ba ki la sdang ban long ki soh ba la bet bad sara ïa ki symbai na ki sngi bad ki bnai kiba la dep da kaba shat ki khmat sha ka jingpynsan pynrangbah ïa kane ka kynhun shwa ba kin mih madan ban ïa aireng ha ka 39th National Games ban pynlong da ka Meghalaya ha u snem ban wan.
