Shillong, Nailur 20
Ka Mawpat SC ka la long ka lahduh ha ka lympung ïalehkai 2nd Division Football League 2026 ba la pynïaid da ka Shillong Sports Association, hadien ba ka la lah ban pynliem noh ïa ka Sohryngkham Sports Club da 2-0 kol ha ka jingïakhun final kaba la long ha ka sngi Saitjaiñ ha SSA Stadium, Polo.
Kane ka nam jop ka la wan urlong lyngba ki kol ba la thep da u Andyson Lapang bad u Reform Pale.
Ha kane ka jingïakhun final la pyndap ïa ka stadium hi baroh kawei da ki paidbah nongpeitkai kiba la wan ban ai jingkyrshan ïa la ki kynhun ha ryngkat ka jingrisa bad kynhoi naduh ki khynnah, ki samla bad haduh kiba la rangbah.
Kumba ka paw na kane ka jingïakhun ka Sohryngkham ka dei ka kynhun ka la ïalehkai bha naduh kaba sdang ha kaba ka la ïoh ïa ki kabu kiba biang, hynrei kam shym la lah ban pynurlong. Hynrei ka Mawpat ka la ïoh ïa ka kabu kaba biang ban pynkhih jar ha ka minit kaba 16 lyngba u Andyson.
Kumjuh ka Sohryngkham ka la pyrshang biang ha ka kylla miet na ka bynta ban pynphai, hynrei kam shym la lah ban thep watla ka la ïoh ïa ki kabu kiba biang. Hynrei ka Mawpat ka la ïoh ban shut ïa ka free-kick ha ka minit kaba 68 bad ka la ïoh ban thep hi jlang da u Reform. Da kine ki ar kol ka la theh umpjah ïa ki rangïalehkai ka Sohryngkham bad haduh kaba kut kam shym la lah ban pynurlong bad shwa ban wai uwei na ki rangïalehkai kane ka kynhun u la shah sei syndon da ka red card naba pynur ïa u rangïalehkai ka Mawpat.
Lyngba kane ka jingjop, ka Mawpat ka la ïohpdiang ïa ka cheque kaba T. 1 lak tyngka ryngkat ka trophy, katba ka Sohryngkham ka la ïoh T. 50 hajar tyngka. Ïa ka nam Top Scorer la khur da u Donboklang Lyngdoh na ka Mawpat uba la thep 12 kol ha kane ka lympung bad ïa ka nam Man of the Match la khur da u Reform Pale.
Ïa ki khusnam la sam da u President ka Meghalaya Football Association u Bah Hamletson Dohling, ha ryngkat u coach ka Jylla u Stanley Rozario, kumjuh u President ka Shillong Sports Association Bah Banteidor Lyngdoh bad kiwei kiwei.
Te kumta ka Mawpat bad ka Sohryngkham ki la kiew kyrdan sha ka First Division ha kaba kin ïoh ban shim bynta naduh u snem ban wan.
