Jowai, Nailur 20
Ka Sorkar Jylla kala rai ban kyntiew ïa ka Jowai Civil Hospital, Ialong na ka 100 jingthiah sha ka 200 jingthiah kaba la mang lyngba ka Prime Minister’s Development Initiative for North East Region (PM-DevINE).
Ïa kane la pynbna da u Myntri ka tnad ka Koit ka Khiah ka Jylla bad MLA ka Jowai Bah Wailadmiki Shylla ha ka jingïalang ïakren bad ki nongïoh jingmyntoi na ka MHIS & PMJAY ha ka 19 tarik Nailur.
U Bah Wailadmiki Shylla u la pyntip ba u la ïoh pdiang ïa kiba bun ki jingujor na ki paidbah, ba ki nongpang ha katei ka jaka sumar ki hap ban thiah ha baranda, bad wat ha ki lynti jong ka Hospital.
Ban weng ïa kum kine ki jingeh, u la ong ba ka Sorkar kala rai ban kyntiew ïa ka Jowai Civil Hospital, Ialong na ka 100 tylli ki jingthiah sha ki 200 tylli ki jingthiah, bad halor kane u la ai khublei kyrpang ïa u Myntri Rangbah ka Sorkar Jylla Conrad K Sangma uba la pdiang ïa ka jingkyrpad ka jong u.
U Myntri u la ïathuh ruh ïa ka jingpynleit jingmut jong ka Sorkar ban kyntiew kyrdan ym tang ïa ki jaka sumar kiba don ha sor, hynrei sha ki thaiñ khapsor kumjuh, khnang ban pynsuk ïa ki paidbah nongpang ban ïabeh shaduh sha sor, da kaba kdew ïa ka Jarain PHC ha Amlarem kaba la kyntiew kyrdan sha ka Sub Divisional Hospital, bad ka Ummulong CHC sha ka 50 jingthiah.
Shuh shuh, u la ïathuh ruh ïa ka jingthmu jong ka tnad ban kyntiew kyrdan sa ïa ka Laskein CHC sha ka Laskein Sub Divisional Hospital, khamtam mynta haba ka Sorkar kala pyrkhat ban kyntiew kyrdan noh ïa ka Laskein sha ka Sub Division.
Halor ka jingduna jong ki doctor Specialist ha ka Jylla, u Bah Wailadmiki u la ong ba na ka liang ka tnad kala shim ïa ka rai ban khot ïa ki Empanel Hospital kiba don ïa ki Specialist ban Empanel bad ka Sorkar ba kin wan ha ki PHC bad CHC katkum ki sngi ba la pynbeit na ka bynta ban leh tang ïa ki ‘Major Surgery’ kaba long ka lad ban pynsuk ïa ki nongpang ba kin lait leit sha ki hospital shimet, bad ki hospital shabar jong ka Jylla.
