Guwahati, Nailur:
Ka sorkar Tripura ka thmu ban pyntreikam sa 6 tylli ki Eklavya Model Residential School (EMRS) hapoh u bnai Naiwieng, ong uwei u heh ophisar ha ka sngi Saitjaiñ.
Kane ka jylla ka don mynta 12 tylli ki EMRS kiba treikam, kiba pynbiang ïa ki jaka sah jong ki khynnah skul kiba wan na ki kynhun riewlum.
Katkum ka jingong u Tribal Welfare Director u Subhasish Das, ka jingshna ïa ki 6 tylli ki skul thymmai ka la dep, ha kaba ki dang sah sa tang ki jingtrei kiba rit ha ki katto katne ki jaka pule.
La khmih lynti ba kine ki jaka pule kin sdang treikam noh hadien ba ka National Education Society for Tribal Students (NESTS) ka la mynjur ban thung shipor ïa ki nonghikai bad ki bym dei ki nonghikai na ki EMRS kiba la don lypa.
Yn shim kam thymmai hadien ban pyndap ïa ki kam ba donkam, la ong u Das.
“Ka Entrance Test ban rung sha ki EMRS ba thymmai ka la dep lypa,” u la bynrap. Ka NESTS ka treikam hapoh ka tnad riewlum jong ka sorkar pdeng bad ka peit ïa ka prokram EMRS.
U Das u la ong ruh ba ka Tripura ka la ïoh jingmynjur ban pyntreikam nalor ka Central Public Works Department (CPWD) na ka bynta ban pynroi ïa ki jaka pule thymmai jong ka EMRS.
U la kdew shai ba ka CPWD ka la antad ba ka jingsna ïa ki EMRS ha ka jinglut kaba palat T. 70 klur, katba ka NESTS ka la buh ban buh T. 50 klur kawei ka skul.
Katba ka Tripura Housing and Construction Board (THCB) ka la antad ba kum kane ka jaka pule jong ka EMRS lah ban tei haduh kumba 54 klur tyngka.
Ka NESTS ka la mynjur T.100 klur na ka bynta ar tylli ki jaka pule thymmai jong ka EMRS ha Mungiakami ha Khowai distrik bad ha Dasda ha North Tripura distrik. Ïa kawei kawei ka skul la mang T. 50 klur.
U Das u la ong ba kano kano ka jingpynlut kaba palat ïa ka pisa ba la ai jingbit na ka bynta ban tei ïa ki ar tylli ki jaka pule yn bei da ka sorkar Tripura.
