Shillong, Nailur 21
Watla ym pat shym la paw dak ban khur ïa ka takma ksiar, hynrei ka jingkhur takma ka India ka la nangïai bteng ha ka sngi kaba ar jong ka Asian Games ha ka lah sngi U Blei ha Aichi-Nagoya, Japan.
Ki lai tylli ki takma ki la wan lyngba ka jingïakop siat suloi, katba ka Suchika Tariyal ka la lah ban thaw ïa ka khana na ka bynta ban long ka nongïalehkai kaba nyngkong eh na India ban khur takma nyngkong ha ka Asian Games ha ka mixed martial arts.
Hynrei ka takma rnong jong ka, ka la wan ryngkat bad ka jingsngewsih hadien ka jingïalehkai semi final kaba ki la kut noh ha ka jingïakhaid bad ka la khanglad ban ïoh rung sha ka final.
Kumba ka long mynta ka India ka la khur hynriew tylli ki takma, kiba kynthup ïa saw tylli ki takma rupa lem bad kawei ka takma rnong na ka Shooting bad kawei ka takma rnong na ka Mixed Martial Arts bad ka la khmih lynti ban khur ïa ka takma ksiar kaba nyngkong ha kane ka lympung.
Ha ka Shooting, ka India ka la khur saw tylli ki takma. U Himanshu Dhillon u la khur ïa ka takma rupa bad u Rudrankksh Patil ki la khur ïa ka takma rnong ha ka jingïakhun para marwei ki shynrang jong ka 10m air rifle. Kine ki ar ngut ki la don bynta ruh ha ka jingïakop siat kynhun ha kaba ka India ka la khur ïa ka takma rupa ryngkat bad u rangïalehkai ba dang 18 snem ka rta u Parth Mane.
Haba kheiñ lang kine ki lai ngut ki la kamai 1898.4 poiñ, hynrei ka China ba la mihkhmat da u Sheng Lihao, Changhong Zhang bad u Sihan Ma, ki la khur ïa ka takma ksiar da kaba kamai 1899.0 poiñ, ha kaba ka la tam na ka 1898.4 ba ka la lah ban pynurlong ha Cairo ha u snem ba la lah.
Kumba ka paw ka Suchika Tariyal ka la long ka nongïalehkai MMA kaba nyngkong eh ban khur takma ha ka Asian Games medal, hynrei kane ka takma rnong kam pat biang na ka bynta jong ka.
Kane ka ‘thei ïalehkai ba la 36 snem ka rta ka la ïakhun tyngeh ha ka semi final pyrshah ïa ka nongïalehkai kaba na Singapore ka Hui Hoon Teo ha ka women’s traditional 60kg. Hynrei kane ka jingïakhun ka la poi sha ka jingïakhaid, hynrei kat ki kyndon jong ka MMA ka la long ka jingkhanglad na ka bynta ki nongïalehkai kiba tam ha ka jingkhia.
Kumba ka Suchika ka la khia kumba 700 gram ban ïa ka liang pyrshah ha ka jingthew jingkhia ha ka por mynstep, bad kumta ka la duh noh ïa ka lad ban jam sha ka final.
Te kumta ka la jaw ummat hadien ka jingïalehkai, namar ka la angnud ban khur ïa ka takma ksiar ha kane ka jingïakhun.
Ka Suchika kaba na ka shnong Kiloi kaba ha district Rohtak kaba ha Haryana, ka la khur ïa ka nam lahduh ha ka World Champion 2024 ha ka jingïalehkai jiu-jitsu bad ka la mihkhmat ruh ïa ka India ha ka jingïalehkai judo ha ka Common-wealth Games 2022 bad ha ka jingïalehkai kurash ha ka Asian Games 2022.
