Kohima, Nailur:
Ka jingïalang ba nyngkong eh jong ka thaiñ Shatei-lam-Mihngi halor ka National Education Policy (NEP) 2020, kaba la pynlong ha Chumoukedima, Nagaland, ka la khot ïa ka jingkyrshan kaba kham khraw na baroh ar ki sorkar jylla bad ka Pdeng ban weng ïa ki jingduna ha ki jingtei kiba ktah ïa ka jingpyntreikam ïa ka polisi ha kylleng ka thaiñ.
Ka jingïalang kaba ar sngi kaba la pynkut ha ka sngi Saitjaiñ, ka la lum lang ïa ki riewstad, ki nongthaw polisi bad ki myntri pule puthi na ki jylla ka thaiñ Shatei -lam-Mihngi ban ïakren ïa ki jingeh bad ki lad ki lynti kiba ïadei bad ka jingpyntreikam ïa ka NEP 2020 bad ban thaw ïa ka lynti ïaid na ka bynta kane ka thaiñ.
Kawei na ki jingtyrwa ba kongsan kaba la mih na ki jingïakren ka long ban thaw ïa ka kynhun ba kyrpang jong ki myntri pule puthi na ka thaiñ Shatei-lam-Mihngi ban pynïadei ïa ki jingpyrshang bad ban pynkhih ïa ki jingpynkylla ha ka pule puthi ha kylleng ka thaiñ.
Ka jingïalang ka la pynpaw ruh ïa ka jingdonkam ban don ka jingïatreilang kaba kham khraw hapdeng ki jylla jong ka thaiñ Shatei-lam-Mihngi, da kaba kdew ba ka thaiñ ka ïakynduh katto katne ki jingeh kiba ïadei bad ka pule puthi kiba donkam ïa ki rukom treikam kiba ïadei bad ki jinglong jingman ba kyrpang jong ka.
Ki nongïashim bynta ki la khot ïa ka jingkylla na kaba thew ïa ka jingkiew ha ka jingpule tang lyngba ka jingpynbna prokram sha ka jingbishar bniah ïa ki jingmih na ka jingpule ba la pynshisha hapdeng ki khynnah skul.
Ki rai ba la pdiang ha katei ka jingïalang ki kynthup ïa ki bynta kiba kynthup ïa ki jingtei ha ka pule puthi, ka jingpynrung nonghikai, ka jinghikai nonghikai, ka jingpule ha ki skul, ka jingpule kaba kham shalor bad ka jingpule ha ka liang ka jingstad.
Ïa kine ki jingai jingmut la khmih lynti ba yn aiti sha ka sorkar pdeng ban leh ïa kaba donkam.
La pynlong hapoh ka phang “Ka Jingpyntreikam ïa ka NEP 2020: Ka jingthmu, ki jingeh bad ki lad ki lynti na ka bynta ki jylla jong ka thaiñ Shatei-lam3-Mihngi,” ka jingïalang ka la pynleit jingmut ha kaba thaw ïa ki buit treikam na ka bynta ban pyntreikam hok ïa ka polisi ha kylleng ka thaiñ.
Haba kren ha ka jingïalang pynkut kum u kongsan, u Myntri ka Pule Puthi jong ka Tripura, u Kishor Barman u la batai ïa kane ka jingïalang kum ka jingsdang jong ka bynta kaba thymmai ha ka liang ka pule puthi jong ka thaiñ ym kum ka jingkut.
U Barman u la ong ba ka jingtreikam jong ka NEP 2020 kan shong ha kaba kut ha ki jingkylla kiba ka wanrah sha ki samla pule, kynthup ïa kito kiba sah ha ki jaka ba jngai.
U la ban jur ruh ba ka jingpule ka dei ban ïaid shabar ban pynmih ïa ki samla pule na ka bynta ban ïoh kam ïoh jam bad ban pynleit jingmut ha kaba pynroi ïa ki nongpynbeit ïa ki jingeh, ki nongthaw jingmut, ki nongseng kam seng jam bad ki nongshong shnong kiba don ka jingkitkhlieh.
