Shillong, Nailur 21
U coach ka Nangkiew Irar SC, u Lavoriyi Theluo u la pynkut noh ka jingïadei bad kane ka klob watla ka lympung ïalehkai Shillong Premier League ka dangïaid shakhmat.
Une u coach u la lah ban kyntiew ïa kane ka klob na ka bynta ban don ha ka kyrdan ba saw ha ka SPL, hynrei mynta ka la hiar ha ka kyrdan ba phra bad kamai 7 poiñ.
Kane ka kynhun kan mih madan mynta ka sngi Ba-ar ha ka SPL khlem u coach pyrshah ïa ka Langsning FC.
Ha ka kyrwoh ba u la pyllait, u Theluo u la ong ba kane ka long ka sien kaba nyngkong eh ba u la mih noh na ka klob wat hapdeng ka lympung ïalehkai SPL ka dangïaid shakhmat, hynrei u la hap ban shim ïa kane ka rai.
Te kumta u la ai khublei ïa ki bor pynïaid jong kaneka klob, ki rangïalehkai lem bad ki paidbah nongkyrshan jong kane ka klob.
“Ka long ka jingsarong ha kaba la lah ban pynlong ïa ka klob ban rung sha ka thup kaba saw hashwa ban ïakhlad lok noh,” la ong u Theluo.
Lah ban kdew u Lavoriyi Theluo u la long u coach uba nyngkong eh na Nagaland ban shimti kum u Coach ïa ka kynhun ïalehkai ka Nagaland na ka bynta ban pynurlong ha ka ban jam sha ka wat kaba khatduh ha ka Santosh Trophy.
