Shillong, Nailur 21
Ka rynsan ïakop siat carom ba la tip kum ka 24th Meghalaya Open State Ranking Carrom Championship 2026-2027 ka la poi sha kaba kut ha ka sngi Saitjaiñ, ha kaba ka Ryntihlang Carrom Club ka la long ka lahduh ha ka jingïalehkai kynhun (team event) hadien ba ka la jop ïa ka Jaïaw Laitdom Dorbar Carrom Club.
Ïa kane ka lympung la pynlong da ka Meghalaya Carrom Association ha Jaïaw Laitdom Dorbar Hall Lumbatemon, ha kaba la ïadon lang u Working President ka Khun Hynniewtrep National Wakening Movement (KHNAM) Bah Thomas Passah kum u Kongsan, kumjuh u Bah SB Kharbangar, Rangbah Shnong Jaïaw Laitdom kum u symbud kongsan ha ka jingdon lang u Bah William Marbaniang uba long nongseng ïa ka Jaïaw Laitdom Dorbar Carrom club, Bah Myguardy Thabah , Bah Ardon K Majaw (Chief Umpire), bad Bah Mebankitkupar Marweiñ bad kiwei kiwei.
Ha kane ka rynsan ïakop la wan shim bynta da kumba 130 ngut ki nongshim bynta kiba na Jaiñtia, South West Khasi Hills, Ri Bhoi bad don ruh na Garo bad kumjuh kiba na kane ka nongbah.
Haba phai sha ka jingïakhun final jong ka Junior Girls la jop da ka Mayaphica Elisa Kharkongor ïa ka Silvarinia Kharmawphlang, katba ha ka liang ki shynrang la jop da u Mebankitkupar Marweiñ ïa u Nicholas Kharjana. Ha ka Mixed Doubles, la jop da u Mathaious Pde bad Drossilin Kshiar ïa u Justin Kharkongor bad Bada Dohling. Ha ka Men’s Doubles la jop da u Arbines Lyngdoh bad Bunlang War ïa u Badon Barim bad Living Kharkongor.
Ha ka Women Singles la jop da ka Sukmon Mukhim ïa ka Badaïahun Dohling. Ha ka Men Veteran la jop da u Bah Arbines Lyngdoh ïa u J.B Sunar. Ha ka Men Singles la jop da u Rajdeeo Sarkar ïa u Justin Kharkongor.
