Shillong, Nailur 21
Ka hat-trick ba la khur da u Balmingstar Lyngkhoi ka la biang pura ïa ka Meghalaya Police F.T ban pynliem noh ïa ka Mylliem SC da 5-0 kol ha ka lympung ïalehkai Shillong Premier League 2026, ha ka lah sngi U Blei ha SSA Stadium, Polo.
Ha kane ka jingïakhun u Balmingstar u la ïoh ban thep ha ka minit kaba 4′, 31′ & 68′, ha kaba la bynrap sa u Everestarly Rynjah (61′) bad kawei pat la ïarap pynthep da u rangïalehkai ka Mylliem u Fedrick Wahlang (77′).
Lyngba kane ka jingjop ka MLP ka la jam sha ka kyrdan balai bad kamai 10 poiñ na ka bynta ban ïaryngkat bad ka Langsning tangba ka jingïapher hapdeng kine ar ka long ha ka ‘head to head’. Katba ka kynhun ïalehkai ka Mylliem ka la ïai sah ha ka kyrdan ba sahtrai bad 1 poiñ.
Ha kane ka kynti ïakhun, la ithuh shai kdar ba ka MLP ka la ïakhun katba lah ban wanphai da ka jingjop, kaba na ka por sha ka por, ka la ñion tyngeh ïa ka kut ba skhem jong ka Mylliem. Ka kol ba nyngkong ba u Balmingstar u la ïoh ban thep ka dei namar ka jingbakla uwei u rangïalehkai ‘dien Mylliem kaba hangne u Balmingstar wut u la beh shaba don ka bol ban ïoh pynkhih jar. Ka kol kaba ar pat ka la wan hadien ba u Rapborlang Marweiñ u la rah shakhmat ïa ka bol bad ha ka por ba biang ba un pyllait sha ka jaka ba la don u Balmingstar uba la ïoh ban pyndei da ka khlieh.
Hadien kane, u Evereststarly u la ïoh ban tehlakam ïa ka bol ba la pynbuh sha u da u Bisharlang Kharumnuid bad khyndiat minit hadien jong kane, u Balming sa shisien u la ïoh ban tehlakam ïa ka.
Ka kol ba san bad ba khatduh ka wan hadien ba u Rapbor u la shut shapdeng ïa ka bol, kaba hangne u Fedrick ha ka jingbakla bad ka bol jlang ka rung sha la ka jong ka kol. Hynrei ka Mylliem kam da dei than ka kynhun ba ïalehkai sniew, katno tam lei lei haba ka la lah ruh ba kan da ïakhaid da mar lai kol pyrshah bad ka Shillong Lajong FC.
Ha ka sngi Ba-ar ka jingïakhun kan long hapdeng ka Langsning FC pyrshah ïa ka Nangkiew Irat SC ha ka por 3 baje nohphai sngi.
