Shillong, Nailur 22
Ka Jylla ka la sdang da kaba khur mar kawei ka takma ksiar bad rupa ha ka lympung ïalehkai 37th East Zone Junior Athletics Championship 2026, ha ka sngi Ba-ar ha Patliputra Sports Complex kaba ha Patna, Bihar.
Kane ka la wan lyngba ka Tusame N Marak, kaba la khur ïa ka takma ksiar ha ka High Jump U-18 jong ki kynthei da kaba ka la lah ban kynthih haduh 1.51 mitar, katba u Wankyrmen L. Mawphlang u la khur ïa ka takma rupa ha ka jingïakop mareh kaba 5000m jong ka kyrdan ïalehkai U-20 ki shynrang ha kaba u la lah ban pyndep ha ki 15:42.94 minit.
Ïa kane ka lympung ka ban neh lai sngi kynthih, la pynlong da ka Athletics Federation of India bad ka Bihar Athletics Association ha ryngkat ka jingkyrshan lang da ka Bihar State Sports Authority. Ki la don haduh 633 ki nongïalehkai na ki khyndai tylli ki jylla kiba kynthup ïa ka Bihar, Arunachal Pra-desh, Assam, Jharkhand, Manipur, Meghalaya, Odisha, Sikkim bad ka West Bengal.
Lah ban kdew ka Meghalaya ka la sei 29 ngut ki nongïalehkai lem bad 4 ngut ki official, te kumta la khmih lynti ba kin nanglah ban ïalehkai ha ki jingïakhun kiba dangsan. Kane ka jingleit shim bynta ka Jylla ka long shi bynta jong ka jingpynkhreh ïa ka 39th National Games ka ban long ha u snem ban wan ha ka jylla Meghalaya.
