Shillong, Nailur 22
Ka jingïalehkai bha ka kynhun ki ‘thei ïalehkai kriket ka ri ka la pynlong ïa ka India ban khur ïa ka takma ksiar kaba nyngkong eh ha ka Asian Games kaba dangjam shaphrang ha Aichi-Nagoya, katba ka kynhun ki rangïalehkai badminton ka la ïakhun tyngeh pyrshah ïa ka Japan bad ka la don jingkyrmen ban khur takma, ha ka sngi Ba-ar.
Katei ka kynhun ïalehkai kriket hapoh ka jingïalam ka Harmanpreet Kaur, ka la pynliem noh ïa ka Sri Lanka da 147 run ha ka jingïakhun final na ka bynta ban bat biang ïa ka nam jop ha ka Asian Games, ha kaba ka la pynlong ïa ka India ban khur hynñiew tylli ki takma.
Ka India ka la thikna ban khur takma ruh na ka badminton ki shynrang bad ka wushu, katba ka kynhun ïalehkai hockey ki shynrang ka la bteng biang ïa ka jingjop hadien ba ka la pynliem ïa ka Sri Lanka da 16-1 kol ha ka Pool-A.
Ki la don ki jingjop kiba ïapher ha ka jingïakop siat suloi bad table tennis, katba ha ka liang ka boxing, ki nongïakura jong ka ri ki la ïai bteng ïa ka jingkhlem shah rem, katba ka ‘thei ïalehkai gymnastic ka Pranati Nayak ka la jam sha ka final ha ka vault.
Haba shimti ban tied nyngkong, ka India ka la lah ban kamai 216/3 bad kane ka long ka jinglah ban kamai bun run jong ka kynhun ki kynthei ha ka Asian Games. Ka Smriti Mandhana kaba la lamkhmat ban tied nyngkong ka la kamai 79 run na ki 45 bol, katba ka Richa ka la ïoh 49 run na ki 22 bol. Kumjuh ka Shafali Verma ka la noh synñiang da kaba kamai 48 run na ki 29 bol.
Ha ka jingkawang bol, ki nongkawang bol ka India ki la lah ban leh la ka bynta ban pynkut ïa ka Sri Lanka tang ha ki 69 run bad ban khur ïa ka jingjop da 147 run.
