Guwahati, Nailur:
Ki pulit ka Dima Hasao ki la ïoh kurup ar tylli ki pistol, ki tiar siat bad ki mobile phone bad ki la ïoh ban kem ïa uwei u briew ha ka por ba ki pynlong ïa ka jingkhynra ha ka thaiñ ba long khlaw ha Dauhaja kaba hap hapoh jong ka Langting Police Station ha ka sngi Saitjaiñ, 19 tarik Nailur.
Ïa kane ka jingkhynra la sdang ha ka por mynstep hadien ba la ïoh jingtip shaphang kawei ka ïingjaiñ ba la shna kyrpang kaba don hapoh kawei ka lyngkha rep jhum ha ka jaka ba don khlaw.
Ha ka jingtalasi, ki pulit ki la ïoh ban kurup ar tylli ki suloi- kawei ka suloi .22 bad kawei ka suloi .32- ryngkat bad ki tiar siat bad ki mobile phone na katei ka jaka. La kem ïa uwei u briew ha ka por ba pynlong ïa ka jingkhynra.
Ïa ki tiar siat, ki kuli bad ki mobile kiba la ïoh kurup la rah noh ha ka kti jong ki pulit. Ki pulit ki la pynlong ïa ka jingtohkit kaba bniah ban tip ïa ki jingjia ha kaba ïadei bad ka jinglap bad ban pynthikna ïa ka bynta jong u briew uba la shah kem ha katei ka kam.
