Guwahati, Nailur:
Ka Congress, ka la jied ïa ki 40 ngut ki nongïalam, ba kynthup ïa ki heh ophisar jong ka seng bad ki nongïalam ba pawkhmat jong ka Assam, kum ki nonglamkhmat ha ka jingïalap paidbah, na ka bynta ka elekshon shiteng samoi ha Nagaon Lok Sabha, kaba la buh ban long ha ka 6 tarik u Risaw.
Ïa kane ka thup kyrteng la aiti sha ka tnad elekshon da u General Secretary ka Congress u K C Venugopal ha ka 16 tarik u Nailur katkum ka kyndon 77(1) jong ka Representation of the People Act, 1951.
Ha kane ka seng la kynthup ruh ïa ka nongïalam jong ka Assam Congress ka Debabrata Saikia, u President barim ka Assam Pradesh Congress Committee u Ripun Bora, u Paban Singh Ghatowar myntri barim, u Alka Lamba, u Imran Pratapgarhi, u Srinivas BV bad u myntri barim ka Tripura u Sudip Roy Barman.
Napdeng ki nongïalam ba pawkhmat kiba la kynthup ha katei ka thup ki long u Myntri Rangbah barim ka Chhattisgarh u Bhupesh Baghel, u President ka Assam Congress u Gaurav Gogoi, u MLA ka Congress u Wazed Ali Choudhury, u myntri barim ka Assam u Rakibul Hussain, u nongaiktien ka seng u Pawan Khera, Supriya Shrinate, u Bhanha Chimarn u president ka NSUI national Congress.
Kiwei pat ki nongmihkhmat kiba sah ha Assam kiba la shah pynpaw kyrteng kum ki nongïalap elekshon ki kynthup ïa ka Satyabrata Kalita, ka Nandita Das, u Abdul Khaleque, u Aminul Islam, u Diganta Barman, u Ramanna Baruah, u Nirmal Langthasa, u Deep Bayan, u Mira Barthakur Goswami bad u Kaushik Kashyap Kalita.
Ka Congress ka la pyllait ïa ka thup kyrteng jong ki nongïalap elekshon hashwa ka elekshon shiteng samoi ha Nagaon, kaba la donkam namar ka jingiehnoh kam jong u MP barim ka Lok Sabha u Pradyut Bordoloi.
U Bordoloi u la hiar shuki noh na ka ïing dorbar thawaiñ jong ka Lok Sabha bad u la mih noh na ka Congress ban ïakhun ïa ka elekshon sha ka ïingdorbar thawaiï ka jylla Assam na Dispur da ka tiket jong ka BJP.
