Guwahati, Nailur:
Ka Assam Chah Mazdoor Sangha (ACMS) ka la dawa ban siew ïa ka bonus kaba heh tam kaba 20% sha ki nongtrei kper slasha ha baroh kawei ka Assam ym duna ïa ka lai taïew shwa ka Sharadiya Durga Puja, kumba ju long ha ki snem ba la dep.
U General Secretary ka ACMS u Rupesh Gowala u la ïathuh ba ka seng ka la aiti ïa ka jingdawa kaba pura sha ki seng kiba mihkhmat ïa ki trai kper slasha lyngba ka shithi No. A/3/2026/162-23 jong ka 25 tarik u Nailar, 2026, da kaba pan ban siew ïa ka bonus kaba heh tam sha ki nongtrei.
Hadien ka jingïakren hapdeng ki nongmihkhmat jong ki kompeni sha bad ki nongïalam jong ka ACMS, katto katne ki kompeni sha kiba heh ki la dep ban ïasoi ïa ka jingïateh ban siew ïa ka bainong kaba 20% sha ki nongtrei jong ki naduh ka 21 tarik u Nailur.
Ki kompeni kiba la ïasoi ïa ka Bonus kaba 20% ki kynthup ïa ka McLeod Russel India Limited, kaba kynthup ïa 31 tylli ki kper slasha; APPL (Toklai), 21 tylli ki kper; Goodricke Group, 14 tylli; M.K. Shah Exports Limited, 14 tylli; Luxmi Tea Company Limited, 13 tylli; Dhunseri Tea Company, 9 tylli; Gillanders Arbuthnot & Company Limited, 6 tylli; Russell Tea India Limited, 7 tylli; Jorhat Tea Company Limited, 4 tylli; Shri Vasuprada Plantations, 4 tylli; Madhuting Tea Company, 4 tylli; M.K. Jokai, 6 tylli; bad Asian Group Tea Company, 2 tylli ki kper.
Katba ki seng tnad kiba ïadei bad ka seng pdeng ki la ïateh kular ha ka thaiñ bad kiba bun ki kper sha kiba dei jong ki riew shimet ban siew ïa ka bonus kaba heh tam kaba 20%. Kine ki kynthup ïa ki kper slasha Koloni, Uphaliala, Megha, Krishna Bihari, Bajalani, Badulipara, Bokakhat bad Holonguri, nalor kiwei kiwei.
U Gowala u la ong ruh ba katto katne ki kompeni ki la pynpaw ba ki kwah ban siew ïa ka bonus mynta u snem ha ki ar bynta.
U nongmihkhmat jong ka ACMS u la pynpaw ka jingkyrmen ba yn sa ïasoi ruh ïa ki jingïateh bad ki kompeni kiba dang sah hapoh kine ki ar sngi ban wan.
U la kyrpad ïa ki nongpynïaid jong ki kper sha kiba dang sah ba kin wan shakhmat bad pyndep ïa ka jingïateh kular khnang ba katkum ka jingdawa jong ka seng, baroh ki nongtrei kper sha kin ïoh ïa ka bainong kaba heh tam kaba 20% shwa ka jingrakhe ïa ka Durga Puja.
