Shillong, Nailur 23
Ka kynhun ïalehkai jong ka MLP 4th Battalion ka la khur ïa ka jingjop ha ka lympung ïalehkai phutbol ba la pynlong da ka Mawkaton Sports Cultural & Youth Club, hadien ba ka la pynliem noh ïa ka Seven Star FC na Nongshillong da 3-2 kol ha ka sngi Ba-ar ha madan Mawkaton, kaba hap ha ka Mawthadraishan Block.
Ha kane ka jingïakhun ka MLP ka la lah ban ïalehkai bha naduh kaba sdang ha kaba ka la ïoh ban thep lai kol ha ka kylla step lyngba u Kiki F Syiemlieh (14), Romarius Laban (40) bad u Ruben Marweiñ (43).
Hynrei ka Seven Star ka la wanphai da ka jingkhlaiñ bor ha ka kylla miet ha kaba ka la ïoh ban pynphai kylla ar kol lyngba u Kweit Lyngkhoi (83) bad kawei pat da u Wanplie Marweiñ (90+1) hashwa ba kan mad ïa ka jingshah rem.
Ïa ka nam Man of the Match la ïohpdiang da u Romarius jong ka MLP bad ïa ka khusnam la sam da u Commandant ka MLP 4th Battalion Sohpian Bah VDS Rymbai.
Kane ka lympung kan bteng biang ha ka sngi Thohdieng hapdeng ka Rymbai Jyrngam FC pyrshah ïa ka Lorchuti FC ha ka por 2:45 nohphai sngi.
