Shillong, Nailur 23
Ka Nongkseh SSCC ka la jam sha ka kyrdan basaw ha ka lympung ïalehkai Shillong Premier League 2026, hadien ba la la pynliem noh ïa ka Rangdajied United FC da 2-0 kol ha ka sngi Balang ha SSA Stadium, Polo.
Kane ka jingjop ka la pynlong ïa ka Nongkseh ban khur 10 poiñ ha kaba ka dang -duna da lai poiñ ïa ka Langsning FC, kaba la bat ïa ka kyrdan ba hakhlieh jong kane ka lympung, katba ka Rangdajied ka dangïai neh ha ka kyrdan ba hynñiew bad 7 poiñ.
Ïa kitei ki ar tylli ki kol jong ka Nongkseh la thep da u Dawanchwa Challam (66′) bad u Aenam Jyrwa (85′).
Hynrei haba phai pat sha ka jingïakhun, kampher wat lada ka Rangdajied ka la mad ïa ka nam rem, hynrei ka la pyrshang ban ïalehkai bha, da ka jinglah ban bat bha ïa ka bor bad ruh ban ïarap ban pynbuh sha ki para ba ïalehkai lang, nalor kata kim shym la aili ïa ki rangïalehkai jong ka Nongkseh.
Ka jingïalehkai ha ka sngi Palei kan long hapdeng ka Shillong Lajong FC pyrshah ïa ka Laitkor SC ha ka por 3 baje nohphai sngi.
