Shillong, Nailur 24
Ka Meghalaya ka la pynkut da kaba khur kawei ka takma ksiar bad rupa lem bad saw tylli ki takma rnong ha ka 37th East Zone Junior Athletics Championship 2026, kaba la poi sha kaba kut ha ka sngi Palei ha Patliputra Sports Complex, Patna, Bihar.
Ha kane ka sngi kaba khatduh jong kane ka lympung ka Jylla ka la khur biang sa lai tylli ki takma rnong lyng-ba u Yiarmanwill Rymbai ha ka jingïakop mareh kaba 200 mitar jong kiba hapoh 20 snem karta da kaba u la pyndep ha ki 22.92 sekhon, kumjuh ka Melibad Kro ha ka Shot Put jong kiba hapoh 20 snem ka rta da kaba ka la lah ban kawang 9.86 mitar lem bad ka Anuska Majhong ha ka High Jump jong kiba hapoh 20 snem ka rta da kaba ka la lah ban kynthih ha ki 1.51 mitar.
Lah ban kdew ha kine ki ar sngi ba la lah, ka Tusame N Marak ka la khur ruh ïa ka takma ksiar ha ka Women’s U-18 High Jump da kaba ka la lah ban kynthih ha ki 1.51 mitar bad ka la khur ruh ïa ka takma rnong ha ka jingïakop kawang sum ne Javelin Throw da kaba ka la lah ban kawang ha ki 32.78 mitar. Katba u Wankyrmen L. Mawphlang u la khur ïa ka takma rupa ha ka jingïakop mareh kaba 5000 mitar jong ki rangïalehkai kiba hapoh 20 snem ka rta, da kaba u la pyndep ha ki 15:42.94.
Halor kane ka jingjop, na ka liang ka synjuk ïalehkai jong ka Meghalaya Athletics Association ka la pynpaw ka jingsarong na ka bynta baroh ki nongïalehkai kiba la pyrshang ban ïalehkai bha ha katei ka lympung.
Watla bun na ki nongïalehkai kim shym la ïoh ka jingshah hikai kaba paka, hynrei ki la lah ban pynpaw ïa ka jingtbit na ka bynta ban kynjoh sha ka thong. Kane ka jingpynpaw ïa ka mynsiem ka jinglah ka jong ki ba kin kynjoh sha ka thong. Kaei kaba ki donkam mynta ka long ba kin ïoh ïa ki lad ban shim bynta, ha ryngkat ka jingïalam bad ka jingkyrshan khnang ba kin nangkiew shaphrang.
Kat kum ka kyrwoh ba la pyllait da u Bah Pleasantly Synnah, Head Coach bad uba long ruh u Joint Secretary ka MAA, la ong ba watla ki la don tang khyndiat kiba la lah ban pynurlong ban khur takma, hynrei kiba bun na ki ki la lah ban kynjoh sha ka kyrdan basaw bad basan ha kane ka jingïakop.
Shuh shuh katei ka synjuk kam lah khlem da pynpaw ka jingai khublei ïa ka tnat ïalehkai jong ka Sorkar Jylla kaba la bei tyngka sha ka synjuk na ka bynta katei ka jingleit shim bynta ha ka East Zone.
