Shillong, Nailur 24
Ka Shillong Lajong FC ka la pynliem noh ïa ka Laitkor SC da 3-0 kol na ka bynta ban jam sha ka kyrdan ba hakhlieh ha ka lympung ïalehkai Shillong Premier League 2026 ha ka sngi Palei ha SSA Stadium, Polo.
Kine ki lai kol kiba ka Shillong Lajong FC ka la thep ki la wan lyngba u Freddy Jyrwa (27′), Riman -khraw Kharumnuid (63′) bad kawei pat lyngba ka penalty ba la shut da u Ïohborlang L. Lyngkhoi (77′).
Kumta da kane ka jingjop, ka pynlong ïa ka Shillong Lajong ba kan khur 14 poiñ na ki hynñiew sien ïakhun, ha kaba ka la tam da 1 poiñ ïa ka Langsning FC (13 poiñ) kaba la don ha ka kyrdan ba-ar bad ka Mawlai SC ka la wan balai.
Haba phai sha ka ka Laitkor, kane kan dei ka sien kaba lai ba kan mad ïa ka jingshah rem hakhmat ka Shillong Lajong ha ki jingïakhun ba ki la ïakynduh ha madan ha ki snem ba la dep, bad ïa ka jingïakhun kaba mynta ka sngi pat ka dei ba la bynrap da ka jinglah ban shan skhem da ki rangïalehkai ‘dien ka Shillong Lajong.
Na ka bynta ka Lajong watla ka hap ba kan ïakhun pyrshah ïa ka Laitkor, hynrei naduh kaba sdang, ki khynnah ïalehkai ki jong ka, ki la kut jingmut triang ban ym kheiñ sting, ban ym shah jem ne ailad ïa ka Laitkor ba kan ïalehkai da kaba suk.
Hynrei haba wan ban bteng ïa ka kylla miet, mih paw kawei ka jingpyrshang kaba kham itynnad bha na ka Laitkor, ha kaba u Wadskhem Marbaniang u la shimti beit halade ban khyrwit jam bha ïa ka bol sha ka kol ka Lajong kaba la lah ban ïoh kem noh ïa ka da u Lakpa Lama ba dei u nongapkol ka Lajong. Hadien katto katne minit ka Laitkor ka la ïoh biang lyngba u Shaipharlin Nongsiej uba la ïoh ban rah shajan ka kut kol ka Lajong pynban kam shym la lah ban thep.
Ha ka sngi Thohdieng ka jingïakhun kan long hapdeng ka kynhun ba bat ha ka kyrdan kaba phra ka Nangkiew Irat pyrshah ïa ka Mawlai SC, ha ka por 3 baje nohphai sngi.
