Shillong, Nailur 25
Ka Meghalaya ka la kut noh ka jingïaid lynti ha ka lympung Dr Talimeren Ao National Football Championship for Junior Girls (Tier 2) 2026-27 da ka jingshahrem kaba khraw da 6-0 kol ha ka jingïakhun semi final kaba la long ha ka step jong ka 25 Nailur 2026 pyrshah ïa ka Sports Authority of India (SAI) ha Narainpur, Chhattisgarh.
Ka kynhun ïalehkai ki kynthei ka Meghalaya, ba la ïalam ne coach da ka Haphilabet Kharkongor, ka la pynliem ïa ka Jammu and Kashmir da 8-0 kol bad ïa ka Punjab da 2-1 kol ban lamkhmat ha ka group jong ki bad ban shah jied ban rung sha ka semifinal. Ka Meghalaya ka don ha ki saw tylli ki kynhun ha ka Group C katba ka Nagaland kala da shah rem noh naduh kaba sdang, kaba sah sa tang ar kynhun ki ban ïakhun pyrshah.
Ka kynhun ka SAI, watla, ka don ha ki 5 tylli ki kynhun ha ka Group A. Ka ïai jop ia baroh saw tylli ha ka group jong ka, da kaba pynliem ïa ka Chandigarh da 11-0 kol, Sikkim 5-1 kol, Tripura 6-0 kol bad Uttarakhand 5-2 kol. Kane ka kynhun ka jingdon ki nonglehkai kiba dei na Assam bad na kiwei ki jylla ka Thain Shatei Lammihngi jong ka ri.
Mynta ka Haphi kaba long ka coach ka la wanrah lai tylli ki jingkylla ha ka kynhun jong ka Meghalaya naduh kiba sha khmat, da kaba wanrah ïa ka Laiahunlang Nongrang, Bansara Rynshiang bad Saphidabet Kharmalki ha jaka jong ka Ripaia Phawa, Bandabetshisha Nongrum bad Jenisha Rani.
Ha ka step kaba idum slap hapdeng ka jingïalehkai kine ki ar kynhun ka Yaiphabi Thokchom ka la thep kol na bynta ka SAI ha ka minit kaba 43 ban pynlam khmat ha bakut ka kylla step bad ki paralok jong ka kila bteng ha ka ban thep kol ha ba wan ka kyla miet, kaba kynthup ïa ka Sayani Chakraborty kaba la thep kol ha ki minit kiba 57′, 70′, bad 72 bad ban khur syndon da ka hatrick bad ka Anjaly Lhouvum ha ka minit kaba 64 kaba la pynkhih jar tang hadien lai minit ba la mih kum ka nonglehkai bujli. Ka kol ba khat duh ha kane ka jingïalehkai la thep da ka Yaiphabi sa shisien ha ka minit ba 84.
Ka la long shisha kaba eh ban pdiang ïa ka jingshahrem, hynrei ban poi haduh ka semifinal ka la long ka jinglehkai bha kum ka jingjop na bynta ka kynhun ka Meghalaya bad baroh ka kynhun ka la sngewkmen sngew sarong ba ki la lah ban poi haduh katei ka kyrdan.
Ki thei ïalehkai ka Meghalaya ki long:
Ka Dawansaphi Snaitang (GK), Paleimon L Lyngkhoi, Daficare Lyngkhoi, Nishalin Nongrum, Venecle Kharmusulman, Peacefully Pohplet, Vanessa P Mawthoh, Deiphiwansara Lyngkhoi, Laiahunlang Nongrang (sub Queenilia Kharkongor HT (sub Bandabetshisha Nongrum 73′), Bansara Rynshiang, bad Saphidabet Kharmalki.
