Shillong, Nailur 25
Ki khynnah kynthei jong ka St Mary’s Higher secondary School bad shynrang ka OM Roy ki la long ki lahduh ka lympung ïalehkai ka Rangdajied United Inter-School Championship 2026, ha ka jingïakhun ïa ki phainal kiba la long mynta hynne ka sngi Thohdieng ha Rangdajied United Football Club (RUFC) Performance Centre.
Na ka liang ki khynnah kynthei, ka St Mary’s HSS ki la lah ba kin pynliem da 1-0 kol ïa ka Pine Mount A, katba na ka liang ki khynnah shynrang jong ka OM Roy pat ki la lah ban pynliem ïa ka Umphliew Jingtip lyngba ka tie breaker kaba long da 3-0 kol, namar haduh ba kut ka por ba la buh, ki ar kynhun ki la lah ban ïakhaid khlem don satia ba ïoh ban pynkhih ïa ka jar.
Ha kane ka kynti kaba mynta, na ka liang ki khynnah shynrang ki skul ba la poi ban ïashim bynta ki long 12 tylli bad na ka liang ki khynnah kynthei ki don 4 tylli ki kynhun.
Ha kaba kut jong kane ka lympung ïalehkai, la sam ruh ïa ki khusnam ba shimet bad na ka liang ki khynnah kynthei kiba la ïoh ban khur ki kynthup ïa ka Inaysa S. Khongnain ka St. Mary’s Higher Secondary School ka la ïoh ban khur ïa ka Golden Glove, ka Marley Lingchamkim Golden Boot hadien ba ka la ïoh ba kan thep 8 tylli ki kol katba ka Deitishisha M. Kharnior ka la khur ïa ka nam Girls’ Player of the Tournament.
Haba phai sha ka liang ki khynnah shynrang, u Daniel L. Nongbri ka OM Roy u la ïoh ban rah ïa ka Golden Glove, u Hamebanjop Langstieh ka Umpohliew Jingtip u la ïoh ban khur ïa ka Golden Boot hadien ba u la ïoh ban thep 9 kol, katba u Lambormanik Khardewsaw ka OM Roy u la ïoh ba un rah ïa ka nam Boys’ Player of the Tournament.
Ïa kane ka lymnpung ïalehkai la lah ban pynlong lyngba ka jingïarap bad kyrshan da ka NEEPCO, NTPC bad Lunia Marketing Pvt. Ltd.
