Shillong, Nailur 25
Duh noh ka Mawlai ïa ka kabu ksiar ha ka lympung ïalehkai Phutbol Shillong Premier League 2026 kaba wan hadien ba ka la lah tang ba kan shu ïakhaid noh da 0-0 kol bad ka Nangkiew Irat, ha ka jingïakhun ba la long ha ka 25 Nailur 2026 ha ka nohphai sngi, ha madan SSA Stadium, Polo.
Pynban shwa ban sdang kane ka jingïakhun, ka la don ka sngap jar ba shipor da ki rang ïalehkai ki ar kynhun ryngkat u Referee bad ki Asst. Referee hapdeng ka madan kaba long kum ka dak ban pynkynmaw burom ïa ka jingkhlad noh ka jong uwei na ki dkhot barim jong ka Council ka SSA u Bah Shandalang Talang.
Kane kan dei ka ka sien ba hynriew jong ka jingïakhaid na ki 32 tylli ki jingïakhun ha kane ka lympung, kaba da kane ka jingmih na kane ka jingïalehkai ba mynta ka sngi, ka Mawlai ïa mynta ka ïaineh ha ka kyrdan kaba lai hadien ba ka la khur 12 poiñ na ki hynriew sien ki jingïalehkai ba la dep, kaba kynhun ba don halor duh ka miej ïakhein point dei ka Shillong Lajong FC kaba la ïoh ban khur 14 poiñ na ki hynniew sien ïakhun ba ka la dep, bud pat sa ka Langsning FC kaba don ha ka kyrdan kaba ar kaba ka la khur 13 poiñ na ki hynriew sien poiñ ki jingïalehkai ba ka la dep.
Katba na ka liang ka Nangkiew Irat ka nam ïakhaid ka pynlong ïa ka ba kan kiew sha ka kyrdan ba hynniew bad ban khur phra poiñ.
Na ka liang ka Mawlai, haduh ba kut ka jingïakhun ba ha kane ka sngi ka long ka kynhun ba khlem pat shah rem wat tang shisien ruh bad ba kan shah thep ruh tang shi kol.
Haba phai sha ka jingïakhun ka long kaba ïabiang bor bad itynnad bha, namar ki rangïalehkai jong baroh ar kynhun, ki la ïeng ïakhun tyngeh bha naduh kaba sdang haduh kaba kut, katno tam lei-lei ïa ki rangap kol jong baroh ar, katta u Lambhamiki Lamare ka Mawlai bad u Surjay Kumar Pariyar ka Nangkiew, kiba na ka por sha ka por, ki la long kiba peitngor, bad phikir kum shi bynta ban nym ailad ïa ka jar ka kol ka jong ki ba kan shah pynkhih na ki jingpyrshang ba la khyrwit sha ki.
Ki kabu ksiar kiba la kham paw na kane ka jingïakhun kadei na u Basuklang Bina ka Mawlai, hadien ba ka bol ba u la ïoh ba un khyrwit dain ka la dei beit ïa ka dieng kol.
Haba wan ban bteng ïa ka kylla miet, ki khyndiat ngut ki paid nongwan peitkai ki shem bad ïohi ïa ka jingïakhun ba shyrkhei bha ha madan, kaba ha kiba kham bun hi ki khep, kam lah ban khlem da pynrah kti pynkhih kjat ïa ki, katno tam lei-lei haba ki bol ba la khyrwit sha ki arliang jong ka kol, ki la shu lait salit ban pynkhih ïa ka jar.
Ha kane ka kynti jong ka jingïakhun, ka buit ïalehkai ka Mawlai ka long ban pynsted bad ban ïa pashat kham hajan ïa ka bol hapdeng para ma ki, hynrei ka jingeh kaba la mih paw ïa kane ka kynhun ka dei ha kaba kut, kaba bunsien kim shim la lah ban urlong sha ka thong kumba ki thmu.
Ha kaba kut jong ka jingïakhun, la shem bad ïohi ba kiba bun na ki rang ïalehkai ki ar kynhun ki la kyllon beit hi kram ha madan na ka daw ka jingbynnud bym lah ban wanphai ryngkat bad ka jingjop.
Lashai ka sngi ka Langsning FC ka don ïa ka kabu ba kan kiew halor duh jong ka miej ïakhein poiñ hadien ba kan mih madan ban ïakhun pyrshah ïa ka Mylliem kaban long ha ka por 3 baje nohphai sngi.
