Shillong, Nailur 27
Ka ‘thei ïalehkai ka ri India ka Ancy Sojan ka la duh da ka said ban khur ïa ka takma ksiar kaba nyng-kong ha ka Asian Games 2026, hynrei ka la hap ban pdiang ïa ka takma rupa hadien ba ka Yingying Huang na China ka la lah ban pynpaw ïa ka jingtbit ha ka jingïalehkai long jump jong ki kynthei ha ka sngi U Blei ha Japan.
Kumjuh ka Shaili Singh ka la duh ei ban khur takma ha kaba ka la wan ha ka kyrdan basaw hadien ba ka ‘thei ïalehkai na China ka Mengyi Tan ka la lah ban wan balai ha ka jingpyrshang kaba khatduh.
Ha katei ka jingïakop ka Ancy ka la lah ban kynthih ha ki 6.53m ha ka jingpyrshang kaba san, hynrei ka Huang ka la lah ban tam da kaba ka la kynthih ha ki 6.55m ha ka wat kaba khatduh na ka bynta ban khur ïa ka takma ksiar. Ha ka wat kaba khatduh ka Ancy ka la lah ban kynthih ha ki 6.49m.
Kumjuh ha ka high jump jong ki shynrang, u Sarvesh Kushare u la khur ïa ka rupa hadien ba u la lah ban kynthih ha ki 2.25m. Ïa ka takma ksiar la khur da u rangïalehkai ka Chinese Taipei u Chao-hsuan Fu uba la lah ban kynthih 2.25m, katba ïa ka takma rnong la khur da u Sanghyeok Woo na South Korea uba la kynthih ha ki 2.22m.
Ka India ka la khur ruh ïa ka takma rnong lyngba ka Parul Chaudhary ha ka jingïakop mareh 3000m steeplechase, hadien ba ka la lah ban pyndep ha ki 9:08.67. Kane ka long ka jinglah ban pynpaw ïa ka jingtbit jong ka. Ka Parul ka la khur ïa ka takma rupa ha ka Hangzhou Asian Games ha u snem 2023.
Ha kawei pat ka liang ka India ka la jam sha ka final ha ka 4x100m relay heats jong ki kynthei. Kine ki kynthup ïa ka Tamanna, Sneha Shanuvali Sathya-narayana, Sude -shna Hanmant Shivankar bad ka Abinaya Rajarajan kiba la lah ban pyndep ha ki 43.65 second ha ka Lane 2.
Ka Japan kaba la lah ban pyndep ha ki 43.65 second ka la wan ba-ar, katba ka Philippi ka la wan balai da kaba pyndep ha ki 43.88 second.
Haduh ka sngi U Blei, ka India ka la khur 4 tylli ki takma ksiar, 16 ki rupa lem bad 17 tylli ki takma rnong.
