Nongstoiñ, Nailur 27
Ki samla ïalehkai bad ki riew ïeit phutbol ka thaiñ Nongstoiñ ki la pynpaw ka jingsngew nguh bad ai ka jingïaroh ïa u MLA ka Nongstoiñ u Bah Gabriel Wahlang uba la lah ban pynlong ïa ka lympung ïalehkai MLA Cup kaba manla u snem.
Ïa kane ka lympung ïalehkai la tip kum ka 2nd MLA Cup Men Knockout Football Tournament 2026 kaba la nangjam shakhmat ha madan New Nongstoiñ da ka jingïalehkai pre-quarter ha kaba la wan shim bynta da ki kynhun kiba la shah jied na ki Zone bapher bapher ba kynthup Nongstoiñ Zone (4 tylli), Lai Lyngdoh Zone Area, Byrki – Sangriang Area Zone (4 tylli), Mawkaton – Laitlseh Zone (4 tylli) bad ka Umyiap Zone (2 tylli), Mawliehbah Area Zone (2 tylli) hadien ba ki la dep ban ïakhun ha la ki jong ki zone.
Nangta, ka jingïalehkai quarter final jong kane ka lympung ha ka liang ki shynrang kan sdang ha ka 28 tarik mynta u bnai , bad ki kynhun kiba la ïoh rung sha ka quarter final ki long ka Pyndengrei, Nongstoiñ FT , Mawkaton , Sang-riang , Mawlangdep FT, Marskuin ,New Nongstoiñ bad Nongkhlaw.
Katba ka jingïalehkai jong ki khynnah kynthei ka la jam sha ka quarter final haduh ka sngi Saitjaiñ jong ka taïew ba la lah.
U samla Chestar Kharbani uwei na ki samla rangbah ka sor Nongstoiñ bad uwei na ki samla riew ïeit phutbol haba kren bad u nongtjoh khubor u la pynpaw ka jingïaroh ïa u MLA ka Nongstoiñ u Bah Gabriel Wahlang uba don ka jingïohi jngai na ka bynta ban kyntiew ïa ka kam ïalehkai phutbol hapoh ka Nongstoiñ.
Shuh shuh u la ong ruh ba kumba long mynta dei kane ka lympung kaba la plie lad ïa ki rangïalehkai shynrang bad kynthei katei ka thaiñ namar baroh shi katta kim don kano kano ka lympung ba kin ïoh ban ïalehkai. “Ngi kyrmen ba lyngba kane ka rynsan ïa kaba u MLA u la pynlong kin ïoh ban sei ïa ki sap ba kyrpang jong baroh ki nongïalehkai ka thaiñ.”
U la ong ruh ba kumba long mynta lada ym dei ba ki don kum kine ki lympung ïalehkai ki khun samla jong ka thaiñ ki la duh ïa ki jingïalehkai, namar haduh mynta ka Nongstoiñ District Sports Asso-ciation (NDSA) kaba don hapoh ka sor Nongstoiñ, kam shym la treikam satia, bad kaba lyngngoh ka long ba balei ka NDSA ka sngap jar jar khlem da lah ban pynlong kino kino ki lympung ïalehkai phutbol kiba ka ju pynlong manla ka aïom.
U Kharbani u la kyntu ruh ïa ka NDSA da kaba u la pynpaw, “Lada ka dei ka jingbym ïa sngewthuh jingmut hapoh ka ïing sngewbha ban ïa pynbeit noh bad dei ban pynlong ïa ki jingïalehkai khnang ba ki khun samla jong ka dong bad ka thaiñ kin ïoh ban ïalehkai”.
Halor kane ka jingmynthi jong ka NDSA, u la kyntu ïa ka Meghalaya Football Association (MFA) ba ka dei ban turklar lem ïa kane ka kam.
U Chestar u la ong ruh ba ha kaba ïadei bad ka jingpynbna (notification) ba la pynmih da ka MFA, hooid ym shah shuh ba ki klob lane kino kino ki kynhun ba kin pynlong ïa kino kino ki jingïalehkai khlem da ïohjingbit, hynrei ha kano ka rukom phi lah ban ong ba kum hapoh ka WKHD ba ka NDSA kam treikam lada ym dei ba ki don sa kine ki lympung ïalehkai (bosti tournament) kiba pynlong ïa ki lympung ïalehkai, hangno ki samla kane ka thaiñ kin ïoh ban ïalehkai.
“Nga sngew ban ong ba ka MFA ka dei ban peit bniah ïa kane ka bynta ha ka thaiñ WKH namar ka NDSA kam treikam shuh bad dei ban turklar ban pynbeit mardor khnang ba ngi lah ban pynlong ïa ki rynsan bapher bapher” la bynrap u Chestar.
Shuh shuh u la kynti ïa ka MFA ba ka dei ban bthah ïa ka NDSA ba kan ai rynsan lang ïa ki kynthei ha ki lympung ïalehkai.
