Shillong, Nailur 27
Watla kan dei ka Asian Games kaba 20 bad mynta u snem la pynlong sa ha Japan, hynrei ym shym la don wat tang iwei ruh na kane ka jylla Meghalaya ki ban mihkhmat ïa ka ri India bad ki poi pynban da shi kynhun ki ‘official’ sha Japan ban sakhi ïa katei ka lympung kaba dangïaid shaphrang.
Kine ki kynthup ïa u Myntri ka tnat ïalehkai u Bah Wailadmiki Shylla, kumjuh u Director ba thymmai ka tnat ïalehkai Bah Alertson Nongbri, u Working President ka MSOA Bah John F Kharshiing bad u General Secretary Bah Finely Lad Pariat nalor kiwei pat kynthup ïa u Senior Project Engineer jong ka State Sports Council of Meghalaya bad u consultant jong katei ka tnat ïalehkai.
Watla ïa kane ka lympung la sdang naduh 19 tarik mynta u bnai haduh 4 tarik u Risaw, hynrei kane ka kynhun na Meghalaya kan dangsah ha katei ka ri haduh ka 28 tarik mynta u bnai.
Watla kiba la paw ki danglong tang kiwei ki phra ngut, hynrei ym pat shym la lah ban pynthikna la ki dangdon ne em sa kiwei pat kiba hap hapoh ka jingbei tyngka da ka Sorkar Jylla bad ïa mynta ym pat shym la tip katno ka Sorkar ka la pynlut na ka bynta katei ka jingleit kai ka jong ki.
Ha ka kyrwoh ba la pyllait ha ka sngi Thohdieng, u Bah John Kharshiing u la ong ba kane ka jingleit jngoh ka la long lyngba ka jingai jingtip, ha kaba ka kynhun na ka Jylla ka la ïoh ban leit jngoh ïa ki jaka ïalehkai kum ka boxing, basketball, table tennis, shooting, archery, athletics bad swimming bad la ong ba ki la ïoh ruh ban ïakren bad ki ‘technical official’ lem bad ki bor pynïaid jong katei ka lympung.
Shuh shuh u Bah Kharshiing u la pynpaw ruh ba ki heh jong ka Jylla kin dangpynkhreh ïa ki jingbishar bniah, ki jinghikai bad ki jingai jingmut sha ka tnad ïalehkai ka Sorkar Jylla, ka ban ïarap ban pynkhlaiñ ïa ka kynhun na ka bynta ka jingpynkhreh jong ki ïa ka 39th National Games ka ban long ha u snem ban wan.
