Shillong, Nailur 27
Ki nongïalehkai ka Shillong College ki la khur san tylli ki nam lahduh na ki hynriew tylli ha ka 13th Inter-School Karate Tourna -ment 2025 ba la pynlong da ka All Meghalaya Karate-Do Association (AMKA) ha ka sngi Saitjaiñ.
Ha kane ka lympung ïalehkai kaba tang shi sngi la wan shim bynta da 30 ngut ki nongïalehkai na ki 11 tylli ki jaka pule. Ïa kane ka lympung la ïasnoh kti lang bad ka Sports Development Cell of Shillong College ha ryngkat ka jingkyrshan lang da ka tnat ïalehkai ka Sorkar Jylla.
Ka lympung ka long ruh shi bynta ban jied ïa ki khynnah don sap ne ka talent scouting programme ba la pynlong da ka AMKA na ka bynta ka jingpynkhreh ïa ka 39th National Games 2027 ka ban long ha kane ka Jylla.
U Gideon Tympuiñ n aka Shillong College u la khur ar tylli ki nam jop ha ka Individual Kata bad Individual Kumite jong ki shynrang. Katba ha ka jingïalehkai kynhun jong ka Men’s Team Kumite la rah da ka St Anthony’s College ba la mihkhmat da u Aventinus George Mylliem, Damebanmer-bha S Blah, Samebanmer-bha S Blah, Ferdinand Samkupar Rani bad u Jasper D Pdang.
Katba ha liang ki kynthei, ka Rebeka Nong-spung jong ka Shillong College ka la khur ï aka takma ksiar ha ka Individual Kata bad ka Individual Kumite. Ka la ïadon bynta ruh ban khur nam lahduh ha ka jingïalehkai kynhun (Team Kumite) ryngkat ki paralok jong ka, kata ka Larisha Kurbah, Kynjailin L Mawnai, Daphilahun Meri Wahlang bad ka Ibadaplin Mukhim.
Shuh shuh ka Shillong College ka la long ka lahduh ha ka liang ki shynrang bad kynthei, katba ka St. Anthony’s bad ka Lady Keane College ki la wan ha ka kyrdan ba-ar.
U kongsan ha ka sngi plie ha ka por mynstep u long u District Sports Officer ka East Khasi Hills Bah Damang Syngkon, uba long ruh uwei na ki rangïalehkai barim uba la wanrah nam ha ki lympung ïalehkai hapoh kawei bad wat shabar ri ruh kumjuh. Katba ha ka sngi pynkut ïa kane ka lympung ïadonlang ka Vice-Principal ka Academy and Student Welfare jong ka Shillong College, ka Dr (Mrs) H. Diengdoh kum ka kongsan.
